Tydelege spor etter ulykkesferda
Éin av fire ungdomar skadd: Bilen kryssa motsett køyrefelt før den gjekk i fjellveggen og rulla rundt.
Bildeserie:
Torsdag i 22-tida fekk politiet melding om utforkøyring og bil på taket på E39 mellom Mobergsbrua og Liafjellstunnelen.
Fire ungdomar frå 15 til 19 år blei frakta til Haukeland med ambulanse. Alle dei fire skal ha kome seg ut av bilen på eigahand.
– Ingen av dei fire er alvorleg skadd, sa operasjonsleiar Kjersti Eidsnes til Midtsiden natt til fredag.
Helse Vest fortel av éin av dei fire gutane har moderate skader. Dei tre andre skal ifølgje politiet i Os vera «forslått».
Kryssa motsett køyrefelt
Bilen hadde retning Halhjem då ulykka skjedde. Etter å ha passert brua mista førar kontroll på bilen. Ut frå spora på staden ser vi at ferda gjekk vidare over motsett køyrefelt, i ein fjellvegg og rulla rundt.
Det var full stopp i trafikken i over ein halvtime etter ulykka. Bilen er totalvrak.
Det er ikkje mistanke om rus og det er ikkje tatt beslag i førarkortet til den unge sjåføren, men det er oppretta sak.
– Dei blir innkalt til avhøyr over helga, seier politioverbetjent Audun Hadler-Olsen.
Ulykkesutsett veg
Det er 80-sone frå nordsida av brua til sørsida av tunnelen.
Det var tett med nedbør i Os torsdag kveld. Stykket mellom brua og tunnelen er ulykkesutsett, blant anna grunna hjortetråkk.
I februar 2010 kom ein bil som køyrde same retning over i motsett køyrefelt og kolliderte med ein buss i det bussen kom ut av tunnelen. Mannen i personbilen (33), som var frå Bergen, omkom etter ulykka. Den gong var det mykje snø i vegen.