Sløkte brann i bustad på Lekven
Ingen blei alvorleg skadd då det braut ut brann i ein fleirmannsbustad i natt.
Rundt klokka 23.55 søndag kveld kom det melding om brann i ein bustad på Lekven.
– Det var tett røyk i kjellarleilegheita og opne flammar då røykdykkarane tok seg inn på badet, fortel Martin Østgulen Svendsen frå Bjørnafjorden brann og redning.
Sløkkearbeidet gjekk greit, klokka 00.44 blei det meldt at dei hadde kontroll på brannen.
– Vi brukte ein del tid etterpå til etterkontroll og utlufting.
Fleire personar til legevakt
Også ambulanse og politi rykte ut.
– Alle som bur i dei ulike etasjane hadde kome seg ut. Ingen var alvorleg skadd, men fleire var til legevakt for sjekk, fortel politioverbetjent Christine Grindstein.
Det ser ut som om brannen starta i ein tørketrommel. Politiet har oppretta sak.
Måtte overnatta ein annan stad
Kjellaretasjen var ikkje mogleg å bu i etter brannen, men dei som bur i hovudetasjen kunne overnatta i huset.
Brannvesenet gav seg på staden i 03-03.30-tida. Då var saneringsselskapet på plass.
