Opna seks nye rom

Os kommune la seg på eit ambisiøst og dels spektakulært prosjekt då dei ville lage fem nye rom oppå taket på sjukeheimen som følgje av at samhandlingsreforma krevde at ein laga til to øyeblikkelig hjelp-senger.

– Vi såg jo for oss at dette skulle vi gjera veldig fort, men heldigvis tenkte vi oss om ein gong til, helsa Nils-Petter Borge, kommunalsjef for pleie-, omsorg- og beredskap.

– Det var bra vi stoppa det då vi stoppa det. Ellers kunne det gått gale.

– Det har tatt litt lengre tid enn først planlagt, men no er utbygginga fullført i tråd med rådmannen sine forutsetningar og i henhald til kostnadsrammene, supplerte leiar for prosjektavdelinga, Tor Inge Døsen.

Les òg: Byggjer rom på 100 dagar

I staden for fem, så blei det seks nye rom. Alle på omlag 26 kvaderatmeter og med eigne bad.

– Det gjer at vi aukar kapasiteten med to rom til 26 plassar.

– Det gjer òg at fleire no kan få einerom, så får framtida vise kva som skjer vidare, forklarte Aud Winsents, leiar for pleie- og omsorg i Os kommune.

– Vi hadde ein tøff vinter i fjor då influensaen satte inn.

– Med desse nye korttidsplassane står vi betre rusta om det blir ein lik vinter i år, supplerar Borge.

Ein forsmak

Dei nye romma er på mange måter ein liten forsmak og test på den store utbygginga som vil koma på Lurane i løpet av dei nærmaste åra.

– Dette vil gje oss eit godt grunnlag for å vurdera kva og korleis vi skal byggja ut vidare.

– No får vi vurdert om romstørrelse og løysningane er slik vi vil gjera det når neste trinn skal takast, seier Borge.

Det er Leigland Bygg som har stått for arbeidet med den nye fløyen.

– De pressa oss godt på tid då vi skreiv kontrakten, men eg håper de har fått det resultatet de ønskja dykk, helsa Mikal Leigland då han på vegne av entreprenøren overrekte ei lita bildehelsing til behandlingsavdelinga.