Bygger rom på 100 dagar

I mai 2011 fortalte kommunalsjef Nils-Petter Borge om krava til øyeblikkeleg hjelp-senger som følgje av samhandlingsreforma. Desse blei etablert kjapt og effektivt i behandlingsavdelinga og ein planla å erstatta dei med eit modulbygg på taket av delar av sjukeheimen.

– Det viste seg at den løysinga ikkje var så enkel som vi trudde.

– I taket på sjukeheimen gjekk det mellom anna ventilasjon som ikkje var berre berre å flytta på, forklarte Borge for tenesteutvalet i førre veke.

Får seks nye rom

Prosjektet blei difor skrinlagt og ein såg på andre løysingar for å erstatta dei sengeplassane ein hadde tatt til øyeblikkeleg hjelp-sengene.

– Løysinga fann vi rett bak sjukeheimen, kor vi har prosjektert inn seks nye rom.

– Kva betyr det for kapasiteten, undra Emil Brimsholmen (H).

– Vi har teke tre rom frå behandlingsavdelinga, med seks nye, så gjev det oss ei netto tilvekst på tre senger, forklarte kommunalsjefen.

Bygger på 100 dagar

I starten på 2013 har kommunen måtta betala for fleire utskrivningsklare pasienter enn dei i perioder gjorde i 2012.

– Utbygginga hastar, kva er tidsramma, undra Arild Mats Nilsen (Ap).

– Vi har pressa entreprenøren ned på 100 dager.

– Det er ambisiøst, men vi prøver å få bygd det så raskt som mogleg. Grunnarbeida er allereie i gang, avslutta Nils-Petter Borge.