Planlegg fem nye rom
Samhandlingsreforma gjer at Os kommuen skal oppretta to senger for øyeblikkelig hjelp. Dette gjev i tillegg to nye sjukeheimsplassar.
I løpet av hausten tek Os kommune sikte på å få på plass dei to øyeblikkelig hjelp-sengene (ØH-senger) dei skal ha som følgje av krava som blir stilt i samhandingsreforma.
- Grunna kompetansen i avdelinga ser vi for oss å nytta to senger der vi i dag har dei palliative sengene (senger for pasienter ved livets slut, journ.mrk), forklarte helse- og omsorgssjef Nils-Petter Borge til tenesteutvalet onsdag.
- I tillegg må vi ta eit pasientrom til legekontor sidan det naturleg kjem eindel inn- og utskrivingar som følgje av ØH-sengene.
Modulløysing på taket
Sidan ein i praksis missar tre senger som følgje av ØH-sengene har Borge og prosjektleiar Tor-Inge Døsen sett på løysingar for å erstatta desse.
- Vi har sett på ei modulbasert løysing på taket til langtidsavdelinga på sjukeheimen.
- Resten av sjukeheimen er tre etasjar, men her er det ein etasje lågare og det er difor godt egna å utvida her.
- Tor-Inge og eg har vore i Trondheim å sett på ein sjukeheim som er bygd med den same modul-løysinga. Eg er trygg på at vi kan få ei teneleg løysing om vi gjer det slik, forklarte Borge.
I Trondheim tok det berre fem månader frå beslutninga om bygging til sjukeheimen sto ferdig. Borge ser for seg at det kan gå like raskt om politikarane støttar forslaget når investeringssaka kjem til politisk handsaming.
Har skjedd ei endring
Utvidinga vil gje fem nye pasientrom, noko som i praksis gjer at ein får utvida kapasiteten med to nye rom.
- Er det i dag lang venteliste på sjukeheimen? undra Anders Hjelle (TvS).
- Det varierar veldig. For korttidsplassar tilbyr vi fortløpande. Ventelista for langtidsplassar er det. Nokre av dei ligg på korttidsplassar, andre får hjelp frå heimesjukepleien.
- Eg oppfattar ikkje det som eit stort problem, men for dei som ventar er det sjølvsagt eit problem og det skal vi ha respekt for.
- Sidan eg jobba i sjukeheim på 80-talet har det skjedd ei stor endring. Den gongen var det nesten slik at pasientane bar inn kofferten sjølv. I dag kjem dei på båre, illustrerte omsorgssjefen.