– Ein milepæl er nådd
Måndag opna dei to øyeblikkeleg hjelp-sengene på sjukeheimen. - No er det slutt på utgreiingar, no er vi i gang, jubla kommunalsjef Nils-Petter Borge.
På behandlingsavdelinga på sjukeheimen har det vore hektisk aktivitet den siste tida for å få i stand dei to romma som skal huse dei to øyeblikkelig hjelp (ØH)-sengene som kommunen måtte ha på plass som ei følgje av samhandlingsreformen.
- Eg er nesten stum av beundring over dei positive haldningane og den energien avdelinga og prosjektet har vist i prosessen.
- Ved hjelp av berre egne krefter, og i godt samarbeid med Haukeland og Helse Bergen har de kome i mål, og det samstundes med at den daglege dont har gått som normalt, skraut Borge.
Klare på eitt år
Kravet i samhandingsreforma er at alle kommunane skal ha eit visst antal ØH-senger, basert på antal innbyggjarar i kommunen, på plass innan 1. januar 2016.
- 7. september i fjor starta vi prosjektet med ØH-sengene.
- I utgangspunktet ønskja vi at det skulle bli eit interkommunalt samarbeid med Fusa og Samnanger, men det fekk vi ikkje til, forklarte prosjektleiar Barbara Træland.
Sengene er førebels fullfinansierte gjennom midlar frå Helsedirektoratet og har gjeve behandlingsavdelinga ei styrka bemanning med ein ekstra sjukepleiar på kvart skift. I tillegg er legetilsynet blitt utvida.
Dette er ØH-sengene
Opphald i ØH-seng skal vere eit alternativ til innlegging i sjukehus. Det er berre pasientar som har funksjonstap der diagnose og behandling er avklart, eller der det ikkje er mistanke om alvorleg sjukdomsutvikling, som kan leggjast inn i ØH-sengene.
Det er legevaktslege, fastlege eller tilsynslege som kan leggja inn pasientar i desse sengene. Max liggjetid er 72 timar.