Krev svar frå vegvesenet

Onsdag 30. desember blei FV 137 gjennom Hegglandsdalen stengt av fleire store tre som bles over ende.

I følgje vegvesenet var ikkje planen å opna vegen igjen før måndag 4. januar. At vegen likevel blei opna 1. januar skuldast, etter det Midtsiden kjenner til, at einskilde politikarar i kommunen engasjerte seg.

I eit brev til Statens Vegvesen stiller brann- og beredskapssjef Stein Gjøsund spørsmålsteikn med fleire av avgjersla rundt hendinga.

– Os kommune har eit prinsipielt spørsmål om kven i Statens vegvesen som tek avgjersle om at vegen ikkje skulle opnast opp før etter helga og ikkje så snart det var praktisk mogleg.

– Det er også av interresse å få vite på kva nivå i forvaltninga hos Statens vegvesen, denne type avgjersle blir tatt, skriv Gjøsund.

Kommunen blei ikkje varsla

I brevet påpeiker Gjøsund at delar av kommunen måtte ha tilførselsveg via Samnanger og Bergen, noko som får store konsekvensar for drift av samfunnet og at beredskapen blir vesentleg vanskelegare og redusert. I tillegg har kommunen ei rekkje 24/7-tenester som er avhengige av å komma seg rundt i bygda.

– Os kommune fekk heller ikkje noko varsel om at vegen vart sperra, heller ikkje når området var rydda og vegen var køyrbar igjen. Underteikna, som også er beredskapsansvarleg, er kjent med at naudmeldingssentralane fekk melding, men at Os kommune, som har viktige funksjonar av beredskapsmessig karakter, ikkje fekk melding. Dette er ikkje godt nok, slår Gjøsund fast i brevet.

Ber dei gå gjennom rutinane

Gjøsund ber vegvesenet ta ein gjennomgang av sine rutinar slik at ein kan unngå denne type hendingar i framtida.

– Eit robust samfunn må vera systemstyrt og ikkje slik at det er personkjennskap som styrer når vegen opnar, avsluttar Gjøsund brevet med.