Er du ein dei 8907 i Bjørnafjorden som får meir i lommeboka?

Vi går no inn i julehøgtida, og for mange er det ekstra vanskjeleg å få pengane til å strekke til.

I Bjørnafjorden kommune bur det 26.257 menneske, og mange av dei kan glede seg, fordi statsbudsjettet for 2025 faktisk har betydning for folk i Bjørnafjorden.

For nokon er det ikkje berre trangt, og for nokon er det diverre heilt tomt.

I Bjørnafjorden bur det 5.986 barn og unge under 18 år. Med SV sine gjennomslag så aukar barnetrygda med 2424 kroner i året frå neste år.

Dette gjer vi fordi vi veit det fungerer, fordi det det er det mest effektive tiltaket mot barnefattigdom. Det sikrar ei større inntekt for familiar som slit med å få endane til å møtast.

I Bjørnafjorden er det 457 minstepensjonistar, av dei er mange einslege, og mange lever i fattigdom med ein trang økonomi.

Derfor er SV svært glad for at vi har fått gjennomslag for at minstepensjonen for einslege aukar med 6000 kroner i året. Det er reine pengar i lommeboka.

I Bjørnafjorden er det 552 personar som får utbetalt bustøtte. For dei som er AAP og dagpengemottakar så vert ordninga betre, noko som gjer det mogleg for endå fleire å sikre seg ein bustad.

Vi veit at mange utset å gå til tannlegen fordi dei er redd for rekninga.

SV har starta tannhelsereform og 1110 unge vaksne i Bjørnafjorden mellom 25-28 år får no 75 % rabatt på tannbehandling, på lik linje med dei 1411 mellom 21-24 år som allereie har fått det.

Det skal ikkje vera dyrare å gå til tannlegen enn å gå til legen, og SV sitt mål er at dette skal gjelda for alle aldrar!

SV har styrka barnehagar og SFO ved å løyve over 1 milliard kroner til fleire tilsette. Dette betyr at barna våre får møte fleire trygge vaksne i kvardagen, noko som bidreg til betre oppfølging og trivsel i barnehage og på SFO.

Dette kjem etter at SV har sørga for at alle får vere med på leiken gjennom at SFO vart gratis for alle 1.-3. klassingar.

Vi må alle ha noko å leve av, og gjennom styrking av omstillinga til grøn industri og grønne arbeidsplassar så skapar vi, og sikrar jobbar no og for framtida, samtidig som vi kuttar utslepp og bidreg til kampen mot klimaendringar.

Dette gjer vi utan å øydelegge havbotnen, for vi meiner alle planar om gruvedrift på havbotnen bør stansast. Med dette sikrar vi naturmangfaldet og vernar naturen for framtidige generasjonar.

Vi må ha ei plan for omstiling, men i ei tid der fleire har problem med å få endane til å gå møtast, så er det likevel kva som er igjen i lommeboka som vert viktigast for folk.

Jula er her, men for 8907 barn og unge, unge vaksne, minstepensjonistar og enda fleire barnefamiliar i Bjørnafjorden så veit ein at ein kan sjå fram til meir pengar på kontoen til neste år.

Det er det politikk handlar om, å prioritere dei som treng det mest.

Marthe Hammer
1. kandidat for SV til Stortinget frå Hordaland