Styrk Bjørnafjord-identiteten – la Kommunetunet forbli eit felleseige!

Kjære politikarar

Ynskjer de verkeleg at Kommunetunet skal seljast?

Vi skriv dette for å utrykke vår meining for å behalde Kommunetunet som ein viktig del av vårt lokalsamfunn.

Kommunedirektøren sitt forslag om å selje Kommunetunet har fleire alvorlege konsekvensar som må vurderast nøye før ei avgjerd blir tatt.

Kommunetunet er ikkje berre eit bygg, det er ein del av identiteten til innbyggjarane på Fusa-sida av kommunen.

• Kommunetunet ligg sentralt i Eikelandsosen og er lett tilgjengeleg for innbyggjarane.
• Det ligg nede ved sjøen, med utsikt over Eikelandsfjorden.
• Uteområdet blir brukt av både dei tilsette og innbyggjarar.
• Kommunetunet har tent som eit samlingspunkt for innbyggjarane i mange år, og betydninga til bygget kan ikkje målast i kroner og øre.

Å selje Kommunetunet vil vere eit tap for vår felles identitet og tilhøyring.

Sal av Kommunetunet kan gje ein kortsiktig økonomisk gevinst, men kommunen må sjå lengre enn raske pengar, og tenkje langsiktig.

Kostnaden ved å leige tilsvarande lokalar i framtida vil mest sannsynleg bli langt dyrare enn dei noverande driftskostnadane. Dessutan vil dei planlagde oppgraderingane ikkje berre auke funksjonaliteten til bygget - det vil òg trekke til seg meir bruk og aktivitet.

Kommunetunet huser fleire viktig tenester og aktivitetar som bibliotek, BUA, historisk arkiv som er brannsikkert, språk kafé, vigselslokale og vallokale.

Det er flittig i bruk av både skular og barnehagar, det er fleire gratis tilbod for barn i feriar og helgar, og det er ein samlingsplass for kulturelle arrangement for alle innbyggjarane.

Desse tenestene er essensielle for vårt lokalsamfunn og bidrar til utdanning, kultur og sosialt samvær.

Å flytte desse tenestene vil vere både kostbart og upraktisk.

Det bør vurderast andre alternativ før det blir bestemt at Kommunetunet skal seljast.

For eksempel kan moglegheita for at fleire får arbeidsplassen sin her vurderast. Alle leigeavtalar i kommunen bør vurderast, opp mot å eige – og kva er behovet i framtida?

Det vart i 2023 vurdert sal av Kommunetunet, sak 82/2023.

Det vart då vedtatt ombygging av Kommunetunet som skulle gjere fleire kommunale tenester betre for innbyggjarane. Både Bibliotek og BUA skulle få utvida opningstid og større lokaler ved installasjon av heis.

Denne ombygginga har ikkje blitt gjennomført.

Det vart og vektlagt at Kommunetunet bidrar til eit betre arbeidsmiljø, noko som betyr mykje for oss som brukar Kommunetunet.

Sak frå 2023 viser at sal av Kommunetunet ikkje vart tilrådd.

Å behalde Kommunetunet er ikkje berre ein økonomisk avgjerd, men og ein avgjerd som påverkar vår identitet, tillit og samfunnsengasjement.

Vi oppmodar dykk til å tenkje langsiktig og å vurdere dei mange fordelane ved å behalde Kommunetunet i kommunen sitt eige.

Helsing tilsette med arbeidsplass på Kommunetunet