Anna Bjørke Kallestad legg opp
– Det var ikkje ei enkel avgjerd å ta, seier Fana-spelaren frå Os.
Anna Bjørke Kallestad, som fyller 26 år i mai, legg opp som handballspelar på øvste nivå.
Anna har vakse opp i Os, og var i Fana sin spelarstall i sesongen som nyleg blei avslutta.
«Fekk drømmejobben - forlater Byåsen» skreiv Aftenposten då Anna flytta til Bergen for å byrja i jobb hos Equinor.
Fana landa på 5. plass av 14 lag i Rema 1000-ligaen, og avslutta sesongen med 32-30-siger over Sola i serieavsluttinga søndag. Byåsen kom på 8. plass.
– Tøft å gi seg
Kombinert med ny jobb har Anna trent for å koma tilbake etter ein skade i korsbandet.
– Eg har enno ikkje kome meg tilbake på det nivået eg ønskjer å vera på, samtidig tar jobben mykje tid, seier Anna til Midtsiden om årsaka til at ho legg opp.
– Det var ikkje ei enkel avgjerd, legg ho til.
Fana il skriv at dei er glad ho prøvde, og ønskjer Anna lykke til vidare - og velkomen tilbake til Fana Arena.
Vi i Fana er uansett glad for at du gjorde et forsøk og takker for det du bidro med. Vi ønsker Anna lykke til med sitt nye liv uten topphåndball, og ønsker henne alltid velkommen tilbake i Fana Arena.
– Kan det bli aktuelt å trappa ned på lågare nivå, for eksempel i moderklubben Os?
– Det er for tidleg å seia. No er sesongen nettopp ferdig, og om eg i løpet av forsommaren saknar handball, er det ikkje umogleg at eg ser etter ein mindre krevjande stad å trena og spela. Men eg bur i Bergen sentrum, så Os er ikkje den nærmaste klubben for tida.
Årets høgreback
Anna vaks opp i Os Turn og var del av ein sterk 1996-årgang.
Før 2013-sesongen gjekk ho til Viking i 1. divisjon, før 2015-sesongen meldte ho overgang til nyopprykka Sola - og fekk dermed debutera på øvste nivå - Rema 1000-ligaen.
Etter tre sesongar i Sola følgde tre sesongar i Byåsen. Der var ho med og tok bronse i 2019/20-sesongen.
Den same sesongen blei ho kåra til årets høgreback i Rema1000-ligaen.
Internasjonal erfaring
Kallestad har også fleire kampar for aldersbestemt landslag.
Ho representerte Noreg i junior-VM i 2016, der dei tok 5. plass.
Året før blei det 6. plass i U19-EM.
– Kva er dei beste sportslege minnene frå desse åra på øvste nivå - og på aldersbestemte landslag?
– Det blei mange gode minne frå tida på juniorlandslaget, der vi var med på fleire store meisterskap.
– Bronsen med Byåsen for to år sidan er eitt av høgdepunkta, men også då vi spelte med Byåsen mot Molde på opningsfest for Trondheim Spektrum, med 7.000 på tribunen.
