Ventar ekstra mange dyr på Osøyro laurdag
Åtte gardar blir representerte i Os sentrum under Bondens Dag.
I 2020 blei det «Sentrumslaurdag», i 2021 fekk fire eksterne utstillarar møta - men ingen gardsdyr på Kyrkjeflaten under pandemien.
Komande laurdag kan Os Sentrumsforening og Os Bondelag endeleg fylla sentrum med både fleire utstillarar på Øyro og mange dyr på Kyrkjeflaten igjen.
– I tillegg til kyr, kalvar, hest, føll, sauar, høns, gjess og kaninar, kjem Øvreeide Gard med «maskinparken» sin, små traktorar som ungar kan trø på, fortel Olav Botnevik.
I alt åtte gardar er representerte på Kyrkjeflaten.
– Det blir også litt action. Utanom kalvesjå (kåring av beste kalv) er det hønsebingo (hønseskitebingo) og demonstrasjon av saueklipping.
Ungane kan også få ri på ponni, ikkje på sjølve Kyrkjeflaten, men langs det nye parkeringshuset og opp til prestegarden.
Mykje mat på Øyro
Det kjem også levande dyr inn på Osøyro, Tonje Mæland tar med seg nokre alpakkaer.
Om ikkje dei viljesterke dyra streikar på spaserturen frå Solbakken til sentrum.
– I sentrumskjerna blir det i hovudsak torgsal, både av eksisterande butikkar, som sikkert har mange sommarvarer til hyggeleg pris etter den kalde julimånaden, til tilreisande utstillarar, fortel Marthe Kristensen frå Fjordfolk.
Elles vil rundt to tredelar av 14 eksterne utstillarar handla om kortreist mat, frå grønsaker til ost.
– Også i sentrum blir det litt action, Lilleballong har med seg oppblåsbar rutsjebane.
Dagen startar tidleg, då gratis frukost no er tilbake på programmet.
Ein vinnar stiller ut
– I fjor var det kåring av Bjørnafjordens beste bærprodukt, der 31 prosdukt frå 10 produsentar sto igjen i finale. Blir dette ein tradisjon?
– Det blir ikkje tilsvarande konkurranse i år, dessverre, men målet var å ha fleire, pokalen skulle bli ein vandrepokal.
– Kanskje får vi det til neste år, og kan køyra denne kvart eller annakvart år seinare, seier Kristensen.
Ho understreker samtidig at chillien i Monsatufto sin vinnarrett i fjor, til liks med resten, er dyrka på Monsatufto i Lysefjorden.
Monsatufto er òg blant årets utstillarar.
