Cowboy for ein dag
Bildeserie: Godt besøk har dei hatt før, men fint vêr er sjeldan vare for Bondens Dag.
Bildeserie:
Laurdag var det fleire barne- og familievenlege arrangement i Os, frå snekring av småbåtar på Oselvarfestivalen til Barnas Dag på Kuventræ og møte med gardsdyr på Kyrkjeflaten under Bondens Dag.
– Eg trur alle har hatt godt besøk. Her i sentrum og på Kyrkjeflaten har det i alle fall vore mykje folk og mange nøgde utstillarar, seier leiar i Os Sentrumsforening, William Lindborg.
Sentrumsforeninga hadde saman med Os Bondelag rigga klart til gratis frukost. Med lettskya vêr hadde dei rekna med 150 gjestar, men det kom over 230.
– Vi hadde nok av det meste, men henta litt påfyll av drikke.
Sauebonde Anders Tveite hadde ikkje med seg dyr, men kjøt frå slakta som nett har kome i gang. Han sto hos kunde Osøyro Kolonial og serverte Taco-Os, lam i nanbrød.
– Eg har nokre privatkundar frå før, Osøyro Kolonial er einaste proffkunde. Silja (Døsen Moberg) er kvalitetsbevisst, og med på å skjerpa produsentar som meg. I dag er det kjekt å vera ute og møta sluttbrukar, seier Tveite.
Kos og konkurranse
Det var utvida program og mange gode utstillarar til årets Bondens Dag. På Kyrkjeflaten var ender, høner, sauar, grisar og hestar som gjestane kunne klappa.
Kamilla viste vinnarkalven, frå garden til Martin Lyssand. Mie viste ein kalv frå Rune Lekven, som fekk 2. plass på kalvesjå. Etterpå fekk tilskodarar lov å amma Marcus og Martinus, to tvillingkalvar frå Søfteland.
– Dei kan hoppa og dansa, men ikkje synga, seier bonde Jostein Gåssand.
Han hadde med seg barnebarnet Elias (12) som hjelpar.
– Eg liker å hjelpa til med dyrene, ikkje berre her, men heime på garden til morfar, seier Elias, også han med cowboyhatt.
Hønedritebingo samla mykje folk, og skapte bra engasjement, men mykje handla berre om klapp og kos.