Folksam laurdag i sentrum
Bildeserie: Både Bondens Dag og Politiets Dag trakk mykje folk.
Bildeserie:
Vêrmeldinga lova ikkje gode tilhøve for arrangørane, men laurdagen enda opp mykje betre enn først førespegla.
På Kyrkjeflaten kunne ungane få koma tett traktorar og dyr, og saueklipp samla mange skodelystne.
I Tunet hadde fleire av butikkane i Os sentrum samla seg om eit utsal, noko som såg ut til å vera god butikk.
Takk til bonden og politiet
Leiar i Os sentrumsforening, Jeanett Borgen Kallekleiv, kan i dag melda om eit godt gjennomført arrangement.
– Denne gangen fekk eg relativt kort tid på å hiva meg rundt å få ting på plass, og vi kunne godt hatt litt meir aktivitet i regi av Os Sentrum med fleire utstillarar og anna moro.
– Heldigvis var det mykje som skjedde i regi av Bondelaget og politiet, så alt i alt er vi veldig nøgde med dagen.
Traktorar og politikk
I Landboden fann du ei utstilling av landbrukskøyretøy.
Den politiske debatten om landbrukspolitikk trakk ikkje det største publikummet, men mange nytta teltet til å setja seg ned å ta seg ein kvil i.
Mykje politi i gatene
Ved sentrumskvartalet hadde politiet i teke oppstilling i samband med markeringa av Politiets Dag.
Oppbodet, med politifolk, bilar og utstyr var tydeleg eit populært innslag i sentrum.
Å få sitja bak i politibilen, kor «røvarane» må sitja, er ikkje kvardags, og køen av ungar var jamn heile dagen.
Det heile vart toppa med høvet til å få kasta ein våt svamp på ein vassekte politi.
Utan straff.