Utan mistenkte i valdtektssaka

Tysdag ettermiddag 16. februar skal det ha skjedd ei valdtekt i ein bustad på Brimsholmen i Søre Øyane.

Torsdag 25. februar gjekk politiet ut og ba alle som var på Brimsholmen eller Lepsøy denne dagen om å melda seg for politiet.

Les òg: – Etterforskar overfallsvaldtekt

Politiet fekk få tips i starten, men fekk bistand frå Kripos og etterforska for fullt utover våren.

I mars kom BT med informasjon om at gjerningspersonen skal ha tatt seg inn i huset til kvinna, der valdtekta skjedde, og reist frå staden i ein bil saman med ein annan mann. Den andre skal ha halde vakt mens valdtekta skjedde.

Politiet ville ikkje kommentera påstandane frå Bergens Tidende.

Har ingen mistenkte

Politioverbetjent Audun Hadler-Olsen seier i dag at saka framleis er under etterforsking.

– Har det vore nokre mistenkte i saka?

– Nei.

– Korleis blir gjerningspersonen skildra av fornærma i saka?

– Vi kan ikkje gå ut med meir informasjon enn det vi har gjort.

– Kva spor sit politiet på?

– Det kan vi heller ikkje gå ut med.

Hadler-Olsen seier etterforskinga er i sluttfasen, men at det førebels ikkje er påtaleavgjerd i saka.

– Førre møte med Kripos var for to veker sidan. Det har vore jobba tett og godt med saka. Vi vil saman med Kripos fortelja meir når vi er klare.