Ti år som styreleiar: Per Eide-Olsen med tilbakeblikk og tankar om framtida
Han fekk ein tøff start som styreleiar. No nærmar det seg fest, og Eide-Olsen trer til side før hotellet blir bygd.
Då Per Grieg sr kom til Os kommune med pengegåve, så dei kunne bygga galleri til kunstsamlinga hans, gjekk vegen vidare til ambisjonar om kulturhus som inkluderte både samling og scene.
Mobergsneset blei destinasjonen, og tomteseljar fekk også selja tomt til StorBergen. Tomta blei utvida på ei stor kaiflate på pælar, og i 2012, eitt år etter at Oseana opna, var det innflytting i Os Sjøfront.
Sameiet Sjøfronten Os består av 86 leilegheiter i 4 bygg.
Styreleiar frå start var Per Eide-Olsen. Eide-Olsen kom frå ti år som sals- og marknadsdirektør i Hurtigruten til pensjonisttilvære på bryggekanten i Os hamn.
– Det var ganske brutalt å bli styreleiar. Eg hadde ikkje venta at det skulle bli så mykje jobb med reklamasjonar, spesielt i samband med fuktig garasje, seier Per Eide-Olsen i eit intervju med OBOS sitt fagblad, Bolig og Miljø, i samband med at det no er ti år sidan han tok på seg vervet.
Møter med leverandørar og, i samband med vidare utbygging, møter med kommunen, gjorde at styreleiarvervet tilsvarte ei full stilling.
Os Sjøfront 2 kom seinare, med yttarlegare 40 leilegheiter.
Sjå bildeserie frå 2006-2016:
Bildeserie:
StorBergen Boligbyggelag fusjonerte med OBOS i oktober 2014.
Midtsiden har fått samtykke til å gjengi delar av intervjuet. Nedst har vi også fått svar på våre eigne spørsmål om drifta, framtida og tankar om komande hotell i nabolaget.
Seinare har det vore rolegare dagar på sjøfronten, men Eide-Olsen og resten av styret har halde seg aktiv.
– Drift og vedlikehald har hatt høg prioritet. Vi har knytt til oss faste handverkarar, sånn at dei kjenner bygget.
Verdien på husværa har i høgaste grad halde seg oppe.
Då dei var nye kosta dei dyraste 7 millionar. Tidlegare i år blei ein av dei selt for 13,5 millionar kroner.
Styret har planar om ein stor bebuar-fest på 10-årsdagen i august.
– Styrevervet har vore givande, eg har lærd mykje. Men eg synest det er på tide å gi stafettpinnen til nokon andre,no, seier Eide-Olsen.
– Kva har vore dei viktigaste eksterne samarbeidspartnarane og dialogpartane til Os Sjøfront?
– Det var svært viktig å raskt få etablert ein god dialog med både kommune og naboar. Tor Inge Døsen hadde ei fortid som prosjektleiar i Stor-Bergen, og var ein nøkkelperson her. Via han fekk vi raskt en særs god kontakt med ordførar, først med Terje Søviknes og seinare med Marie Bruarøy.
Styrleiar gløymer aldri seansen då han sto saman med Søviknes og såg på området mellom Os Sjøfront og den nye moloen.
– Korleis vil du ha det her? spurde Søviknes.
Han hadde med seg ein teiknar som lagde skisser etterkvart som forslaga og ønska kom.
Dermed blei det ein fin, liten park på plassen.
Per er også glad for det gode samarbeidet med Oseana.
– Det første Ole Tobias Lindeberg gjorde då han overtok som direktør, var å kontakta oss. Vi er like begeistra for ekteparet Mjelstad, som driv restauranten!
– Kven har vore dine viktigaste «kollegaer» i styret?
– Det er sjølvsagt vanskeleg å trekka fram nokre enkeltpersonar, mange dyktige har vore innom desse ti åra, alle med ulik kompetanse og kapasitet. Skal eg nemna nokon, må det vera Oluf Hessen. Han har sete i styret lengre enn dei fleste, og har ein finger med i det meste.
– Korleis har sameiget sett på aktivitetar som bryggedans, Statsraad Lehmkuhl-ankomst, feststemte på veg til og frå Oseana og, no sist, moteshow?
– Det gode samarbeidet med kommunen er allereie nemnt, og det dekker absolutt arrangement som det du spør om. Vi ønskjer aktivitetar velkomne, og då helst i organiserte formar, som då Madam Ane nyleghadde moteshow her. Det var så kjekt initiativ at vi faktisk brukte annonsekroner p å spreia den glade bodskapen!
– Det blir jobba med å bygga hotell på nabotomta. Kva fordeler og utfordringar trur du det vil ta med seg, og kva vil styret legga vekt på i dialog med kommune og utbyggar i prosessen vidare?
– Det er spennande planar, dette, og på mange måtar godt at arbeidet har kome eit steg vidare. Vi håper utbyggar får jobba fram eit løysingsforslag i fred, utan ttarlegare krav og føringer frå kommunen.
Eide-Olsen seier det er minst tre faktorar styret i Sjøfronten vil vera spesielt opptatte av:
- Tilkomst forbi Sjøfront 2, som er trafikkfarleg slik den er i dag.
- Parkeringskapasitet både for gjestar og bebuarar.
- At miljøgata langs blokkene blir verande bilfri.
– Dette siste har vi jobba for i mange år, og føler at vi etterkvart har lykkast. Men det var ein kamp.
Som ein kuriositet fortel den tidlegare Hurtigruten-leiaren at kommunen ikkje er den einaste som har tenkt i retning varme senger i nabolaget.
– Eg fekk utgreidd sjansen for å legga ei Hurtigrute i vinteropplag ved den gamle moloen. Ideen var at skipet skulle tena som hotell for konferansar på Oseana. Alle var einige i at ideen var god, men kostnadane til utbetring av den gamle moloen blei for høge. Det er snd, men no ligg vi an til å få eit permanent hotell i staden, og det er bra!
– Kva eigenskapar bør vedkomande ha, som tar over etter deg?
– Det er vanskeleg for meg å uttala meg om, einkvar styreleiar vil ha sin eigen stil. Min måte å jobba på er kanskje gått ut på dato.
– Sidan sameiget ikkje har eigen vaktmeister, finn eg stor glede i å prøva å vera til hjelp for naboane, 24-7 om du vil. Og så prøver eg å gjera dette utan å bli ein «Narvestad», seier Per Eide-Olsen og ler.
