Tatt ut til nytt ultra-VM

I 2011 tok osingen Thomas Andersen bronse i VM i ultraløp (70 km) i Irland.

Les òg: VM-bronse til Thomas

I år er det VM igjen, denne gong i Wales 6. juli, og måndag blei den 13 mann sterke norske troppen tatt ut.

Troppen består av 8 menn og 5 kvinner, blant dei er Sverre Morten Slethaug, Thorbjørn Thorsen Ludvigsen og osingen Thomas Andersen, alle frå FIK BFG Bergen.

Sjå heile troppen på kondis.no.

– Du veit aldri

Blant Thomas sine ferskaste prestasjonar har vi nok ein siger i det 100 km lange pulkløpet Expedition Amundsen i mars i år, beste norske tid og 11. plass blant 1.400 førehandskvalifiserte deltakarar i Ultra Challange Mont Blanc i august i fjor og siger i "Noregs råaste fjelløp", Hornindal Rundt i juli 2012.

– Pulkløpet har nok ikkje så mykje å seia for uttaket, men både Hornindal Rundt og det eg gjorde i Mont Blanc har nok vore viktig for uttaket.

– Eg er ikkje overraska over at eg er tatt ut, men eg hadde heller ikkje vore overraska om eg ikkje var med i troppen. Du veit aldri, så dette var godt nytt, seier Thomas til Midtsiden.

Løypa blei lengre og betre

Andersen presterer betre desse lengre løypa blir. I VM var det planlagt noko han kallar "nærmast eit strandløp", men no har løypa blitt meir sånn som osingen trivst i.

– Dei har auka lengda frå 50 til 75 km, det passar meg bra.

Varmar opp med maraton i Spania

Thomas, som har blitt semiproff med avtale med Salomon, skal delta for sponsoren i fjellmaraton i Spania før VM, i Zegama Sky Race.

Byen og kommunen Zegama ligg i baskerland nord i Spania, og Zegama Sky Race byr på 2800 høgdemeter i maraton (42,2 km) i fjellet.

– 42 kilometer er litt kort i forhold til distansane eg presterer best på, men det blir nok ein fin del av oppkjøringa til VM med eit løp i fjella i Spania.

– Men sjølv om eg skal til VM i juli er det Mont Blanc 28. august som blir årets hovudmål og høgdepunkt, seier Thomas Andersen om det 116 kilometer lange fjelløpet der han i fjor tok 11. plass.