Tatt i 60 km/t i 30-sona
Ein mann i 50-åra blei køyrd frå busskur til «drukkenskapsarrest», ein mann i 30-åra blei fotgjengar.
Tysdag skreiv UP ut 25 forenkla forelegg og gjorde eitt førarkortbeslag i Os.
Onsdag var dei tilbake på Lepsøyvegen, men då sjekka dei farten i 30-sona mellom Hagavik Hjemmebakeri og Storum, der det pågår vegarbeid.
– Her blei det skrive to forenkla forelegg, i tillegg blei det førarkortbeslag då ein bil blei målt i 60 km/t i 30-sona, fortel politioverbetjent Audun Hadler-Olsen.
Vedkomande er ein mann i 30-åra.
Full 50-åring til sjenanse for publikum
Onsdag blei ein mann som sat og drakk på busshaldeplassen i Os sentrum fjerna av politiet.
– Vedkomande var til sjenanse for publikum og drakk på offentleg plass.
– I tillegg var han verbalt ufin og blir meldt for forulemping av offentleg tenestemann.
Vedkomande, ein mann i 50-åra, blei køyrd til arresten i Bergen.
Mann i 40-åra utan førarkort
Ein av dei involverte i kollisjonen på Haugsneset torsdag ettermiddag er meldt for uaktsam køyring og det er tatt beslag i førarkortet hans. Mannen samtykka i beslaget.
I 21-tida torsdag kveld blei ein «ungdom» i 40-åra kontrollert av politiet.
Han køyrde moped i Os sentrum, men har ikkje gyldig førarkort.
Klokka 23.15 torsdag kveld hadde politiet kontroll på Søfteland. Her blei det skrive ut mangellapp grunna dårleg teknisk stand på ein bil.