Slutt for Gastronomen

Då Gastronomen Delikatesse og Fetevare opna dørene i lokala til Fisketorget 24. mars var det berre godord å henta.

– Dette har vore etterlengta, sa matattaché for Hordaland fylkeskommune, Gunnar Nagell Dahl.

– Den krafta Gastronomen tilfører sentrum trur eg er heilt uvurderlig. Tusen takk for at de tør satsa, helsa ordførar Terje Søviknes under opninga.

Fredag 8. august la bedrifta ut følgande melding på facebooksida si:

«Hei alle Gastronomens venner. Tiden har vært utfordrende for oss i startfasen og vi er veldig lei oss og vi beklager så mye til alle, men vi stenger dørene i morgen inntil videre. Vi kommer tilbake på tirsdag med mer informasjon om fremtiden til butikken vår. Utsiktene er usikre da vi har en tung lass og bære med uforutsette investeringer og dessverre et tungt offentlig byråkrati og forholde oss til som også har kostet oss mye penger med søkeprosesser etc. Vi håper noen kloke hoder kan hjelpe oss over kneiken. Som sagt mer informasjon på tirsdag, men inntil videre er dessverre Gastronomen stengt.»

– Kommunale krav knekte oss

Medeigar Jon Widar Storli fortel at det er kostnader som følgje av kommunale krav som gjer at dei no ser seg nøydd til å stengja.

– Vi fekk krav om bruksendring, sjølv om vi, slik vi såg det eigentleg berre skulle vidareføra det som hadde vore i lokala tidlegare.

– Vi fekk og krav om at all kommunikasjon mellom oss og kommunen måtte gå gjennom ein ansvarleg søkar, som vi måtte leige inn.

– Det kosta pengar og tok tid, før vi i det heile tatt hadde fått starta opp.

– I tillegg kom kommunen, berre dagar før vi skulle opna, med eit vedtak frå 2005 om at vi måtte installera fettutskiljar på avlaupsvatnet.

– Vi fekk dispensasjon til å opna utan denne på plass, men kravet hang over oss og etterkvart kom trugsla om mulkt og dagsbøter om vi ikkje fekk den på plass.

– Desse krava har gjort at vi har måtte bruka driftsmidler for å oppfylle dei, noko som igjen har gått utover leverandørane våre.

– No har dei sagt stopp og banken er ikkje villig til å gje oss meir i lån. Så vi ser ikkje noko anna løysing enn å leggje ned, forklarar Storli.

«Liv på Øyro» gir uvisse

Storli fortel at dei har freista å få inn nye investorar, men at desse ikkje har vore villige, mellomanna på grunn av uvisse om kva som skjer med bygget Gastronomen ligg i.

– Vi har ei toårig leigekontrakt.

– Uvisse om kva som skjer med bygget etter det, har gjort at mange vegrar seg for å gå inn med midlar.

– Vi hadde tru på konseptet og følte at vi bidrog positivt for sentrum, men slik det blei er det diverre ikkje liv laga.

– Med den uvissa som er kring kva som skjer med bygget, blir det riven eller pussa opp, tykkjer eg kommunen burde gjeve oss dispensasjon til dette blei avklart.

Sakna hjelp og vegleiing

Spesielt ein ting reagerar Storli på etter møtet med kommunen og det offentlege byråkratiet.

– Eg saknar betre hjelp og vegleiing frå kommunen.

– Når vi som nystarta bedrift kontaktar kommunen for å spørre om kva som må til, så blei vi berre møtt med krav og beskjed om å gå inn på Alt-inn for å søka elektronisk.

– Det var lite råd og hjelp å få frå kommunen. Dei kunne til dømes ikkje hjelpa oss med kva spesifikasjonar som låg i kravet til fettutskiljaren med tanke på dimensjon og kapasitet.

– Kommunen treng ein næringskonsulent som kan hjelpe nystarta bedrifter gjennom byråkratiet og i gong, avsluttar Storli.

Les òg: Trist, men vi strakk oss langt