Sikra medalje i lagtempo
– Det beste vi klarte på ein dag som denne.
I går gjorde Sverre Lunde Pedersen det skarpt på 5.000 meter, der han kom i mål som beste norske, og landa på 7. plass.
I dag gjekk han lagtempo saman med Peder Kongshaug og Allan Dahl Johansson, som kom inn for Sander Eitrem.
Norge gjekk i 3. av 4 par, der dei blei slått av Canada. Dei to låg på foreløpig 2. og 1. plass før USA og Nederland i siste par.
Der blei det noko dramatikk.
USA ramla, Nederland tok gull på heimebane og Norge fekk bronse bak Canada på 2. plass.
– Det er alltid spesielt når nokon ramla, men det er dessverre ein del av gamet, seier Sverre til Midtsiden etter løpet.
– Sjølv var vi litt seine frå start, vi fekk aldri den farten vi ønskte, og det er vanskeleg å justera seg undervegs.
– Skulle vi gjort noko annleis så skulle vi ha opna noko hardare, seier Sverre.
Sette banerekord i 2021
I fjor mista Sverre VM på heimebane på Hamar.
I 2021 var han med på å setja banerekord i Thialf i Heerenveen, med tida 3:39.080 i verdscupen.
Pedersen gjekk då saman med Johansson og Engebråten.
Vinnartida i dag var 3.38,36, Norge gjekk i mål på 3.40,93.
Sverre var med Norge med å ta OL-gull i lagtempo både i Beijing i 2022 og i Pyeongchang i 2018.
I 2020 blei det EM-bronse i lagtempo. Pedersen gjekk då saman med Bøkko, Engebråten og Ulekleiv.
Han har også vore med å ta gull samanlagt i lagtempo i verdscupen minst fem sesongar, første gong i 2009-2010.
