Provosert av Skorpen

Då rådmannen sin årsrapport for 2012 blei handsama i formannskapet tysdag 5. juni reagerte Lars Atle Skorpen (Ap) på formuleringar om at kommunen måtte vera kynisk i høve tilrettelegging for nye arbeidsplassar og at ein ikkje einsidig burde satsa på rimelege og små bustader/tomter.

Skorpen fremma forslag om å ta ut dei aktuelle formuleringane frå dokumentet, noko som berre fekk Ap sine stemmer i formannskapet.

– Verdiar vi ikkje har

Arbeiderpartipolitikaren følgde opp saka med eit lesarinnlegg; Velkommen til Os, særleg om du er ung rik, frisk og høyt utdannet.

– Vi skal vera kyniske i høve utbyggarane, ikkje innbyggarane.

– Lars Atle Skorpen tillegg rådmannen og oss andre representantane i formannskapet verdiar og haldningar vi ikkje har, tordna Jon Sivert Rykkel (V).

– I formannskapet forklarte rådmannen greitt kva han meinte med formuleringane, påpeika Rykkel som fekk støtte frå Erik Neverdal (TvS) som meinte utspelet frå Skorpen var urettferdig både i høve rådmannen og dei andre representantane i formannskapet.

– Kompetansebedriftar er velkomne i Os, innbyggarar med høgare utdanning er positivt. I Os er det eit faktum at utdanningsnivået ideellt sett kunne har vore meir balansert. Difor er det å legga tilrette for bedriftar som treng folk med høgre utdanning eit riktig grep, argumenterte Rykkel.

– At dette blir tolka av Skorpen til å skulle skapa eit elitesamfunn er heilt feil.

– Eg står lett bak formannskapet og rådmannen si formulering i saka.

– Her har Os Ap starta valkampa vel tidleg. Å framstille oss andre som kyniske og uærlege er i overkant, meinte Rykkel.

Fekk ikkje unnskyldning

Skorpen hadde forfall til kommunestyremøtet tysdag og kunne ikkje sjølv svara på kritikken frå Rykkel.

– Arbeiderpartiet sine øvrige representantar bør beklaga desse skuldningane på vegen av partiet og Skorpen, meinte Venstrepolitikaren.

– Det var litt av ei salve frå ein engasjert Rykkel, men han får ikkje noko unnskyldning frå Arbeiderpartiet.

– Vi vil oppretthalde Skorpen sitt framlegg til vedtak frå formannskapet. Om rådmannen meiner noko anna enn det han skriv, så får han skriva det då, repliserte Harald Døsen på vegne av Arbeiderpartiet.

– Får kritikk, uansett

Espen Aspenes (Frp) hadde, som Rykkel, reagert på Skorpen si uttale i formannskapet og i etterkant.

– Eg tykkjer Skorpen overreagerar.

– Vi har den siste tida drive ein samrøystes næringspolitikk, og drøfta kva næringskluster vi kan bli gode på, slik at vi kan skaffa kompetansebedrifter til kommunen.

– Er det eitt parti som har fått så hatten passar når det gjeld bustadutbygging opp gjennom åra så er det Frp, og iallefall frå Ap.

– No får vi jammen meg kritikk for at vi ønskjer å vera meir strategiske og styra det meir òg, kommenterte Aspenes.

Kva bustader skal ein bygga?

Dette fekk Døsen til igjen å entra talarstolen.

– Vi vil òg vera med å styra, men i fleire retningar enn berre store bustader for rike og vellukka.

– Vi vil ha bustader til førstegongsetablerarar og unge menneskje også. Dei påverkar folkehelsa, som dette står under, like positivt, meinte Døsen.

– Ein variert boligpolitikk er noko vi alle ønskjer, men då må ikkje de tillegga oss meininger vi ikkje har, avslutta Aspenes.