– Berre for dei vellukka?

Då formannskapet onsdag behandla rekneskapen og årsmeldinga for 2012 reagerte tidlegare rådmann, no gruppeleiar i Arbeiderpartiet, Lars Atle Skorpen, sterkt på enkelte av formuleringane til noverande rådmann Knut Terje Rekve.

"Vi veit kva vi treng, nemleg høgt utdanna innflyttarar/kompetansearbeidsplassar, og gjennom det attraktive tomter for busetnad og næring. Vi treng i mindre grad fylle opp med billige husvære som medfører massetilflytting og pendling."

"Det viktigaste er kanskje at vi ved tilrettelegging av nye arbeidsplassar er kynisk (journalisten si utheving) på at desse bør prioriterast til kunnskapsbedrifter. Dette for å auke utdanningsnivå og gjennom det betre skuleresultat og ansvar for eiga helse. Kva type busetnad ein tilrettelegg for vil og spele inn. For einsidig satsing på rimlege og små bustader/tomter er ikkje gunstig i eit folkehelseperspektiv."

Det var desse utsagna Skorpen reagerte på, og då spesielt at kommunen skal vera kynisk.

– Underforstått betyr dette at det er dei unge, rike og vellukka, med god helse, som er velkomen til Os.

– Det er umogleg for meg som politikar å vera med på å vedta, tordna det frå Skorpen, som håpa formuleringane var eit uhell frå rådmannen si side, og at han ville endre desse.

Ei misforståing?

Rådmann Knut Terje Rekve svara med at tolkinga til Skorpen måtte bero på ei misforståing.

– Gjennom styring kan vi få til ei balansert utbygging, i staden for å la utbyggarane styra det heile.

– Når det gjeld å vera kynisk, så meiner eg med det at vi ikkje skal løpa etter dei første og beste som vil etablera seg, men ha is i magen og vera medvitne på kva type arbeidsplassar vi til dømes vil ha i Lyseparken, forklarte Rekve.

Skorpen høyrde kva rådmannen sa og var nøgd med at det var noko anna enn han leste, men han var likevel ikkje nøgd med at rådmannen ikkje ville endra formuleringane i dokumentet.

– Ordet balansert kling godt i mine øyre.

– Om rådmannen ikkje vil erstatta teksten med det han sa, så får vi heller etter beste evne prøva å overbevisa fleirtalet om å endra det når saka skal opp i kommunestyret.

– Det vi har diskutert!

Skorpen vil nok få utfordringar med å overbevisa sine politiske motstandarar om å få endra teksten.

– Det kan sjå ut som om det er skrive krast og strengt, men det er dette vi har diskutert politisk.

– Korleis kan vi som kommune innretta oss i høve å skapa attraktive arbeidsplassar?

– Det er ikkje å stikka under ein stol at vi ønskjer oss høgt utdanna innbyggarar.

– Eg sit med ein følelse av at Lars Atle Skorpen overreagerer, svarte Espen Aspenes (Frp).

Ei byrde for folkehelsa?

Dei to utsegna frå rådmannen kjem under kapittelet om samfunnsutvikling og folkehelse/miljø, det er noko av grunnen til at Skorpen reagarar.

– Det at det står der det står, betyr at det skal vera ein bevisst haldning frå kommunen om at her skal ikkje innflyttarar legga ei byrde til folkehelsearbeidet.

– Ikkje eingong Bærum og Sola hadde tenkt på å formulera seg slik. Eg kan ikkje forstå at noko parti kan stå bak dette, svara Skorpen.

– Må vera lov å seia kva vi ønskjer

Heller ikkje ordførar Terje Søviknes (Frp) ville vera med på Skorpen si tolking av formuleringane.

– Vi må ta eit samla samfunnsansvar som politikarar.

– Det er alltid viktig å sørgja for at alle har det sikkerheitsnettet dei treng, men samstundes må vi tenkja korleis vi kan gjera den kommunale kaka størst mogleg.

– Då er det ein fordel at gjennomsnittsinntekta er høg. Samstundes ser vi at høgt utdanna folk gjerne engasjerar seg i det frivillige. Det ønskjer vi, men det betr ikkje at vi ikkje ønskjer alle velkomne til Os.

– Eg meiner det må vera heilt greit å seie korleis vi ønskjer å utvikla kommunen og at vi ønskjer ei kommune med høgre gjennomsnittsutdanning og gjennomsnittslønning enn andre kommunar. Det må vera lov, meinte Søviknes.

– Hadde formuleringane stått under næringslivspolitikk så hadde det vore greiare, men når det står under folkehelse, så er det ikkje greitt, repliserte Skorpen som fremma forslag om at dei to formuleringane blei tatt ut av dokumentet.

Dette fekk berre arbeiderpartiet sine to røyster.