Nytt år og nye moglegheiter: Ta ansvar for din eigen digitale kompetanse
DEBATT: Å overlate «dataansvaret» til ektefelle, barn, ein god ven eller ein annan «nærståande» kan vere risikabelt.
Nær 850.000 menneske i vårt land manglar eller har avgrensa digitale ferdigheiter, eller har rett og slett ikkje tilgang på verktøya. Det er forholdsvis fleire eldre enn yngre som slit, og seniorar er overrepresentert i statistikken over dei som fell utanfor.
Dette fører gjerne til isolasjon, manglande kontakt med vener og familie, avgrensa tilgang til viktige tenester (bank, helse, nyheiter osv.), mindreverdigheitskompleks og frustrasjon.
Manglande digital kompetanse kan i ytterste konsekvens også representere eit demokratisk problem. Eit godt eksempel er den digitale folkeavstemminga om oppløysing av Innlandet fylkeskommune for nokre år sidan. Kor mange fall ut av den?
Vi må nok skilje mellom dei som av openberre årsaker ikkje kan nytte seg av digitale verktøy og dei som sjølv velger å ikkje gjere det.
Sistnemnde handlar om haldning, og det er dei eg sikter til.
Å overlate «dataansvaret» til ektefelle, barn, ein god ven eller ein annan «nærståande» kan vere risikabelt.
Kva gjer du den dagen din «dataansvarlege» ikkje lenger er tilgjengeleg? Kven skal då sørge for at rekningar blir betalt, legetimar bestilt, reseptar fornya og andre livsnødvendige ærend blir gjennomført?
Mi klare oppfordring er, i den grad du er fysisk og mentalt kapabel, ta ansvaret for det digitale sjølv.
Du kan ikkje setje deg på utsida av samfunnet og klage over at alt fungerte så mykje betre før.
Du lever no, med alle dei utfordringane, men også moglegheiter det medfører.
Ein av moglegheitene er å bli med på kurs og møter som Seniornett arrangerer.
Seniornett er ein landsomfattande, frivillig organisasjon med lokalforeiningar over heile landet – vi hjelper seniorar på nett.
I Bjørnafjorden er det Os Pensjonistforening som er den lokal representanten for Seniornett Norge.
Vi tilbyr dataopplæring kvar torsdag ettermiddag og ein tysdag føremiddag i månaden på Os Eldresenter
Vil du vite meir er du er velkommen innom på kafeen vår på Os Eldresenter. Den er open kvar måndag, onsdag og fredag mellom klokka 10 og 14, eller du kan ringe 913 83 884 for meir informasjon.
Datakursa våre er gratis og uforpliktande.
Du har aldri brukt internett, smarttelefon, nettbrett eller PC, seier du?
Desto større grunn til å møte opp. Vi stiller absolutt ikkje krav til førehandkunnskap. Velkommen!
Bjørn Sivertsen
Leiar Os Pensjonistforening og Seniornett Bjørnafjorden
