– Må ikkje snakka den ned!
Kommunestyret er nøgd med at KPMG ikkje fann grunn til kritisera prosessen rundt ombygginga på Os Ungdomsskule. – Vi får ein kjempeskule, meiner politikarane.
Bakgrunnen for saka er at hovudverneombodet i Os kommuen har bedt kontrollutvalet forestå ei uavhengig tredjepartvurdering av ombygginga og rehabiliteringa av Os ungdomsskule, spesielt med tanke på at prosjektorganisasjonen ikkje har følgt romprogrammet i Skulebruksplanen for Os kommune, og at vesentleg dokumentasjon knytt til arealdisponering har preg av tildekking av fakta.
Hovudverneombodet si vurdering er at reelt læringsareal på den rehabiliterte skulen ikkje er tilstrekkeleg til å husa ein ungdomsskule med tre årstrinn på fem parallellar kvar.
Må nytta alle areala
Til å gjera vureringa hyra kontrollutvalet inn KPMG. Rapporten frå revisjonsfirmaet blei tysdag handsama i kommunestyret.
– Eg er glad KPMG i hovudsak seier ting er i tråd med lovar og reglar.
– Vi gjer ei historisk satsing på skular med 300 millionar kroner totalt. Det er nok ikkje meir enn det må vera, men det har blitt gjort eit stort arbeid frå dei forskjellege arbeidsgruppene.
– Dei har snudd kvar ein stein for å finna best moglege løysingane. Vi får ikkje like store areal på Os ungdomsskule som på Nore Neset, men eg er heilt sikker på at Os ungdomsskule blir god.
– Når det no byggast ei stor og fin kantine, så kan ikkje den berre bli brukt i storefri, men må takast i bruk heile skuledagen.
– Det må ikkje bli slik at vi no snakkar ned Os ungdomsskule, argumenterte Bjørn Matland (H), som har vore med i Ad hoc-utvalet for skulebruksplanen.
– Legg opp til korridorundervisning
Harald Døsen (Ap) var ikkje like nøgd med prosessen som Matland.
– Eg har ikkje tenkt å snakka ned Os ungdomsskule, men som lærar i nesten 40 år veit eg litt om å undervisa i korridorar.
– Det er ikkje ei framtidsretta løysing.
– I helsevesenet jobbar dei iherdig for å få bort korridorpasientane, her legg vi opp til å få korridorelevar, meinte Døsen med referanse til punkt 5.2 i rapporten frå KPMG.
– Det var kanskje noko med detta å tolka tekst då, repliserte Ingrid Netland (Sp) med referanse til diskusjonane om årsmeldinga frå rådmannen.
– Ein god demokratisk prosess
Som Matland har også Netland sete i Ad hoc-utvalet for skulebruksplanen.
– Mandatet til gruppa var skildra godt og gruppa blei satt saman med representantar frå dei tillitsvalde, administrasjon, politisk nivå, vernetenesta og foreldrerepresentantar.
– Vi skulle byggje skule for 60 år fram i tida.
– Eg opplever at det har vore 100% demokratiske prinsipp som har lagt til grunn, det har vore høgt under taket og gode diskusjonar, men ikkje alle innspel og synspunkt har blitt tatt til følgje, men slik er det i ein demokratisk prosess.
– Hadde det vore at vi skulle ha to like ungdomsskular, så kunne vi berre tatt ein blåkopi av Os ungdomsskule og satt på Nore Neset, men det er ikkje framtidsretta.
– No får vi to likeverdige A-skular og det skal vi vera stolte av, meinte Netland.
Får ikkje ny når du rehabiliterar
Ho fekk støtte av Anders Hjelle (TvS) som har sete i arbeidsgruppa for ungdomsskulen på Os. Ikkje som politikar, men som foreldrerepresentant.
– Det har vore ein lang prosess, ein god planprosess og heile vegen ein open prosess. Vi har mellomanna kunne følgje utviklinga i dei lokale media heile vegen.
– Når ein skal rehabilitera ein 50 år gamal skule, så får ein ikkje ei ny skule, men vi får ei like god skule som den som byggast på Nore Neset.
– Difor blir eg, som Matland, trist når nokon no byrjar å snakke ned Os ungdomsskule allereie før den er ferdig.
– La oss bli ferdige med rehabiliteringa. Vi finn sikkert noko feil, akkurat som vi kjem til å gjera på Nore Neset, men det får vi løysa etterkvart, argumenterte Hjelle som fekk æra frå Gustav Bahus (Frp) for at Os ungdomsskule no blir totalrehabilitert i staden for berre flikka på.
– Den opprinnelege ramma var tynn, men no kjem vi i mål.
Les òg: – Klar til skulestart