Køyrde utan førarkort - hamna i grøfta
Utforkøyring i Hegglandsdalen, tjuveri av elspark og nok ein fartskontroll på Halhjemsvegen.
Litt før klokka 05 natt til torsdag fekk politiet melding om utforkøyring i Hegglandsdalen.
– Det var ingen skade på verken køyretøy eller involverte.
– Men bilførar, ein 18 år gamal gut, er meldt for køyring utan førarkort, opplyser politioverbetjent Atle Birkeland.
Tjuveri av elspark
Politiet fekk i går også melding om tjuveri av elsparkesykkel.
– Den sto ved Os ungdomsskule då den blei tatt. Tjuveriet blei oppdaga litt før klokka 15.40.
Sparkesykkelen er svart og av merket «Ninebote». Politiet er interessert i tips.
Nok ein kontroll på Halhjemsvegen
Etter å ha tatt 16 syndarar på to timar tysdag var UP tilbake i 70-sona på E39 Halhjemsvegen onsdag.
Denne gong blei det 10 forenkla forelegg.
Høgaste fart blei målt til 88 km/t, noko som resulterer i 6.700 kroner i forelegg og to prikkar på førarkortet.
