Klassesiger i Stoltzen
Anne Marit Skjeie (50) frå Os sette ny personleg rekord og vann klassen sin i Stoltzekleiven Opp.
I helga har årets Stoltzekleiven Opp gått av stabelen - med løyperekord i både kvinne- og herreklassen.
Thorbjørn Ludvigsen, som førre helg sette ny løyperekord i Liafjellet Opp, sprang opp på 08:06 og slo sensasjonelt Jon Tvedt sin rekord på 08.13, som har stått sidan 1995 (!).
Kristine Størmer Steira sprang opp dei 800 trappetrinna på 9:35 og knuste den tidlegare kvinnerekorden på 9.56, sett av Anita Horkestad.
Anne Marit vann klassen sin
Anne Marit Skjeie, som for to veker sidan kom på 2. plass uansett klasse i Langedalen Opp, gjekk til topps i klassen 50 - 54 år i Stoltzen.
I konkurranse med 123 andre i klassen sette Anne Marit ny personleg rekord med 12:25 og vann.
– Eg har ikkje førebudd meg på annan måte enn før, seier Anne Marit, som jobbar som instruktør hos Sprek og Blid Os.
Den gamle rekorden hennar var på 12:50 og er frå 2004.
– Det går i spin-timar, styrke og instruksjon på seniortrim, eg har berre hatt fire fjellturar sidan 4. august.
– Eg var veldig glad for at eg fekk plass, eg saman med 1000 andre på venteliste. Og så var det naturlegvis veldig kjekt å koma til topps og få tida si.
– Og då var du sprengt?
– Nei, eg har ikkje den evna til å ta meg sånn ut, eg er ikkje den så sleng meg over mål. Så eg har nok meir inne, trur den spreke 50-åringen.
Pers av Styrvoll
Raskaste herre frå treningssenteret i Os Næringspark var Kjetil Styrvoll, som persa og sprang opp på 10:41.
Geir S. Skaten frå Opptur Motbakkeklubb, var raskaste frå Os og kom på 3. plass i klassen 35-39 år.
Han kom i mål på 9:50, medan persen hans er på 9:25 (2001).
Den raske ungdomen Øyvind Odland kom i mål på 10:31, godt nok til 18. plass i gutar 15-17 år. I fjor sprang han på 10:23.
Sjå òg: Resultatliste på stoltzen.no.