Jubel for E39
NTP stadfestar E39 Svegatjørn-Rådal: – Dette var betre enn venta, eg er letta og veldig glad, seier ordførar Terje Søviknes (Frp).
Fredag formiddag kom lekkasjen om at det i Nasjonal transportplan, som blei lagt fram klokka 12 i dag, ville koma midlar til ny veg mellom Os og Bergen.
No er dette stadfesta.
– Det blei betre enn venta. Dei ligg inne med nye kostnadar, prosjektet har av ulike årsake fått auka pris frå 5,3 milliardar, som vi hadde rundt nyttår, til cirka 6 milliardar.
– Likevel tar staten resten av kaka, 3,4 milliardar, medan bompenge-delen held seg på 2,6 milliardar som i søknaden, godt under 50 prosent.
Sånn står det om saka i NTP-framlegget:
• For prosjektet E39 Svegatjørn – Rådal, i kommunene Os og Bergen prioriterer regjeringen oppstart i første fireårsperiode. Prosjektet er over statsbudsjettet for 2013 tildelt midler til forberedende arbeid og eventuell anleggsstart i 2013.
• Dagens veg, med en gjenomsnittlig døgntrafikk på 15.000 kjøretøy, går gjennom boligstrøk og er svært ulykkesutsatt. Flere steder er det problemer med framkommelighet. Prosjektet omfatter bygging av om lag 16 kilometer firefelts veg i ny trasé vest for Nestun, med om lag 13 kilometer i tunnel.
• I tillegg legges om lag 3 kilometer av riksveg 580 i ny trasé, og fylkesvegen i Lysefjordområdet blir rustet opp. Utbyggingen vil føre til tryggere trafikk, bedre framkommelighet, mindre miljøbelastning for beboere i området og bedre forhold for kollektivtransporten.
• Kjøretiden på dagens veg mellom Os og Bergen er om lag 35 minutter utenom rushtiden. Utbyggingen er beregnet å gi en reduksjon på 17 minutter i kjøretiden.
• Prosjektet er anslått å koste om lag seks milliarder kroner, som er forutsatt finansiert med 3,4 milliarder kroner i statlige midler og 2,6 milliarder kroner i bompenger. Det er lokalpolitisk tilslutning til delvis bompengefinansiering av prosjektet. Det er aktuelt å legge bompengesaken fram for Stortinget i 2013.
Vil byrja å bygga til vinteren
Prosjektet, som vil ta 5-6 år å fullføra, kan koma til å starta allereie til vinteren 2013-2014.
– No håper eg at regjeringa får lagt bompengeproposisjonen fram for stortinget før sommaren og at vi får denne vedtatt for byggestart på slutten av året i år eller tidleg i 2014.
– Maratonløp med hinder
Søviknes er tydeleg letta over framlegget.
– Innspurten har vore som eit maratonløp med mange hinder, ein augestikkar-art og nye EU-krav til tunnelar som dei siste.
– Dette har kosta blod, sveitte og tårer politisk, og knallhard jobbing over tid. No er det endeleg lønningsdag! jublar han.
Søviknes kom frå møte i Bergen til Os rundt klokka 12.
– Det var deilig å sitja i bilen på veg til Os i dag og veta at om rundt seks år vil denne turen ta halve tida.
Betyr mykje for mange
Ordføraren trur ikkje effekten på dagens framlegg kjem med éin gong, men gler seg over at dette betyr mykje for mange, allereie frå i dag av.
– For næringslivet i Os kan dette få rask effekt, spesielt når det kjem til planlegging om framtidig utvikling, utviding av eksisterande bedrifter og tilflytting av nye.
– Om vi skal vera konkret så er Lyseparken i Endelausemarka, eigedomsutvikling på Bjånes, hotell ved Oseana naturleg å nemna, men det er nok mange mange fleire i Os som gler seg over dette.
– Ikkje ein dag for politiske skulderklapp
– Kva synes du om Skorpen og Netland som på vegne av Ap og Sp er ekstra stolte i dag?
– No har det vore ulike fleirtal i Oslo desse 40 åra det har vore snakk om ny veg til Bergen, og ulike fleirtal i Os. Men det at vi i innspurten har hatt ei så brei politisk semje om dette prosjektet har vore avgjerande.
– Sjølv om det er stortingsval i år er dette ikkje dagen for å gje seg sjølv politiske klapp på skuldra, dette er dagen vi skal gle oss saman, meiner Søviknes.