– Det blir ja til Svegatjørn-Rådal!
– Det kjem pengar til Svegatjørn-Rådal og byggestart blir så snart det er praktisk mogleg, røper Lars Atle Skorpen (Ap), tre timar før NTP blir lagt fram.
Fredag 12. april klokka 12 skal samferdselsminister Marit Arnstad, saman med statsminister Jens Stoltenberg og miljøvernminister Bård Vegar Solhjell, presentera stortingsmeldinga om Nasjonal transportplan 2014-2023.
I Os er det knytt store forventningar spesielt til E39 Svegatjørn-Rådal, 16 kilometer ny veg mellom Os og Bergen, eit prosjekt til 5,3 milliardar kroner.
– Prosjektet ligg i NTP med midlar til gjennomføring, seier lokalpolitikar og gruppeleiar i Os Arbeiderparti, Lars Atle Skorpen.
Han refererer til det han karakteriserer som bombesikre kjelder i regjeringa.
– Dei ser det som ein fornuftig brøk mellom bruk av statlege midlar og bompengefinasiering og går for prosjektet, seier Skorpen.
Byggestart i år?
– Dette er ein solid Ap-siger, med god hjelp frå fleire personar og institusjonar på lokalt og regionalt plan.
Osingar og andre har venta i rundt 40 år på den nye vegen. Når den er ferdig blir bilturen mellom Os og Fana på knappe 10 minutt.
– No blir det byggestart så snart det er praktisk mogleg, folk kan allereie byrja å planlegga kva dei skal ha på seg på opningsdagen om 5-6 år.
Folk kan truleg også byrja å bestilla stein, prosjektet sit med 2,4 millionar kubikk med steinmassar i overskot.
Ferdig i 2018
Fakta om E39 Svegatjørn – Rådal:
Lengde: 15.410 meter ny E39 (13 km i tunnel)
Omfang: Total 17.240 meter hovudveg, 1.300 meter ny fylkesveg med gang og sykkelveg
Totalkostnad: 5,3 milliardar (4,2 mrd kr prisnivå 2010)
Forventa anleggstart: 2013
Forventa opning: 2018
Les òg: Faktaside om prosjektet på vegvesen.no
Meir spenning knytt til NTP
Midtsiden kjem tilbake med meit om NTP og prosjektet E39 Svegatjørn - Rådal.
Fleire osingar og andre hordalendingar er nok også spente på kva NTP seier om E39 Aksdal - Bergen, og val av trasé mellom Stord og Os.