– Jesper var eit varp

Både herrelaget og damelaget har fått seg nokre kampar etter ferien, begge i Åpningscupen, damene også i NM, der dei 24. september speler 3. runde i NM i Oshallen mot Sola.

Men det er først søndag at serien startar, damelaget med bortekamp mot Sotra, som så vidt berga plassen i vår, men i ny hall og ny trenar truleg kan yta Os god motstand.

Herrelaget startar serien på heimebane, mot Åsane i Oshallen frå klokka 16.

Herrelaget er tilbake i 2. divisjon og har rusta seg til kamp med ny trenar, Jesper Svensson, som kom rett frå eliteserien til Os.

Storskårar i storslag

Jørgen Wold, ein av dei som kasta flest ballar i motstandar-nota for Os, er svært nøgd med den nye trenaren.

– Å tilsetja Jesper må vera noko av det beste som har skjedd på herresida i Os-handballen, seier Jørgen.

– Han har kome rett inn i gruppa og har ingen problem med å justera seg til vårt nivå. Han gjer oss betre på det vi er gode på og viser seg samtidig å ha eit utruleg godt auge for å plukka vekk feil.

– Ofte er det små detaljar, men det er veldig effektivt, ting vi aldri ville sett sjølv, seier Jørgen.

Rask effekt?

Herrelaget til Os har fått ny trenar, men i stallen er det få justeringar.

Espen Risti, som var ei viktig brikke i opprykkssesongen, har lagt skoa på hylla.

Einaste nye spelar førebels er det unge talentet Nils Andris Hamre (16), henta opp frå eigen stall.

– Vi har lært mykje allereie, men effekten av ny trenar vil nok auka utover sesongen, vi har meir å øva på.

– Uansett trur eg vi held oss i 2. divisjon og eg gler meg veldig til seriestart på heimebane, seier Jørgen Wold.