Høyrde ein bil på tunet, så var alle handleposane vekke
– Det er mogleg at nokon sniker rundt og sjekkar kven som er på ferie.
Tysdag formiddag opplevde ein familiefar som bur på Skeie at alle daglegvarene han hadde kjøpt blei stole.
Han hadde vore og handla på formiddagen, men tok ikkje varene inn i huset med det same han kom heim.
– Eg skulle inn i garasjen eit ærend. Sidan det ikkje var varer som skulle på kjøl, sette eg dei berre på trappa, fortel han.
Mens han sto i ein bod i garasjen, høyrde han at det kom ein bil utanfor.
– Vi har leigebuarar, og tenkte dei kanskje fekk besøk, eller at nokon som hadde vore hos naboen berre snudde i innkøyringa vår.
Men då han skulle inn i huset igjen, var varene vekke.
– Først trudde eg at sambuar fleipa med meg, eller at det var ei misforståing.
– Men etter å ha sjekka alle moglegheiter eg kjem på, skjønner eg ikkje noko anna enn at varene rett og slett er stolne.
Nokre av daglegvarene var kostbare, det låg for rundt 2.500 kroner i mat i posane.
– Eg tviler på at dei som var her var på jakt etter mat, men sidan dei stal lurer eg på om dei også i utgangspunktet var i uærleg ærend, at dei er rundtom og sjekkar kva hus som står tomme no i ferien.
Det einaste særtrekket han la merke til med bilen, var lyden.
Det var ekstra brumming frå bilen, som om den hadde skade i eksosanlegget.
– Det er også derfor eg vil åtvara, at folk låser bod og garasje, og har ein avtale med naboar om å følgja med mens dei er vekke, seier innringar.
