Marmorløve sakna frå Mobergslia
Den eine ligg på bakken, den andre er sakna.
Villaen på Mobergslia, som frå 1930 til 1993 var kjent som Christian Michelsens barnehjem, er no eigd av Bjørnafjorden kommune og ikkje blant eigedomane som kommunen har ute for sal.
På kvar si side av trappa i front har det lagt to tunge marmorskulpturar og halde vakt. No er den eine vekke.
– Det har hendt frå tid til annan at løvene har blitt skubba i bakken. Tidlegare denne veka blei det oppdaga at den eine er skubba utfor muren, mens den andre er vekke, fortel leiar for teknisk drift i Bjørnafjorden kommune, Dag Søfteland.
Dette har truleg skjedd i helga, 19. eller 20. mars.
Kommunen gjekk ut med etterlysing i går.
– Løvene er tunge, dei veg truleg rundt 200 kilo. Om nokon har stole dei, har dei nok både hatt ein tilhengar, nokre sterke folk eller ein kran med seg, trur Dag.
Han har foreløpig ikkje sjekka skråninga nedanfor villaen, om løva er kasta utfor.
Etter helga blei det også oppdaga innbrot og hærverk i Fjellheim.
Politiet var onsdag kveld på synfaring for å sikra spor.
Skal rusta opp uteområdet
Det er ikkje lenger folk som bur i villaen, men kommunen bruker delar av arealet som lager, og har tilsyn med den.
Nabo og kunstnar Arne Mæland har fått lov å bruka delar av tomta som beite for alpakka, og yter som takk ein innsats med å halda området ved like.
– Vi har ein fin avtale, og har sjølv plan om å pynta litt utanfor. Det er mange turgåarar i området, og kjekt om det blir sjåande litt finare ut.
Mæland har lang erfaring med både skulpturar generelt og marmor frå Italia, som løvene er laga av, spesielt.
– Han ville hjelpa oss både å bolta dei fast og å restaurera dei. Dessverre skjedde dette før han kom i gang, men vi håper å få begge løvene på plass igjen.
Tips kan rettast til kommunen eller politiet.
Stolne skulpturar har tidlegare kome til rette.
