Fylkesmannen i Hordaland har kome med forslag om å starta fisket i Oselvo 1. juli i år. DN sluttar seg til forslaget, som no er ute på høyring med svarfrist 1. april.
– Vi gler oss over dette, men meiner samstundes at vi fint klarer å regulera fisket sjølv, seier styremedlem i gruneigarlaget på Søfteland, Roald Helle.
Då fisket i Oselvo i fjor starta så seint som 15. juli hadde fisketida frå 2009 til 2012 blitt redusert frå 15 til 8 veker på tre år.
Les òg: Ikkje nøgd med nye fisketider
– Det er dokumentert tilfredsstillande og stabil mengd med yngel frå år til år. Vi grunneigarar kjenner elva og følgjer godt med. Vi kunne fint ha starta fisket i juni, som før, og regulert i løpet av sesongen om det var naudsynt.
Over 100 fisk under Osbrua
Grunneigarlaga hadde årsmøte i går, og eit av emna dei tok opp var fisken som dei to siste dagane har samla seg under Osbrua, ved utlaupet til elva.
I februar i fjor var forskarar å leita etter lus på aure som sto i elva.
– Eg var og såg på det i går, det står over 100 fisk der, 95 prosent er sjøaure, og så er det litt smolt og nokre vinterstøingar på veg ut.
– Formen ser betre ut enn på dei som var her i fjor, men nokre har lus og nokre har skader frå lus, seier Helle.
Fisken skal no ut i sjøen og eta seg feit til dei kjem tilbake i mai og juni.
– Vi kjem til å følgja med på dei og kor lenge dei blir ståande. Dei har ikkje lang tid å eta seg feit på, det er synd om dei blir ståande 1/3 av tida under Osbrua, for der er det ikkje mykje mat.
Ei klype salt
Forskarane konkluderte i fjor med at auren ikkje sto ved elveutlaupet for avlusing (lusa døyr i brakkvatn/ferskvatn), men for å justera saltbalansen.
Det blei funne lus på berre 1 av 36 aure. Men då hadde rett nok auren stått i brakkvatn i nesten to veker, noko som gjer at ein del fiskarar i Os tar rapporten "med ei klype salt".