Fin fredag - aktiv helg
Nyt fredagen for i helga er det fare for regn, men fortvil ikkje. Det er mykje å få med seg i Osbydo denne helga.
Fredagen vakna vi til solskinn og ein vakker haustdag. Finvêret vil halda seg heile dagen med temperaturar rundt 10 grader og lite vind. Laurdag og sundag er det derimot varsla nedbør.
Om du har lyst på ein rocka konsertoppleving fredag kveld speler Stephen Ackles på ER-AN Vegkro klokka 22.
Utestadane held sjølvsagt òg ope fredag.
Laurdag
er det meldt mellom 0,2 og 2,6 mm nedbør og 10 til 13 grader. Ingen grunn til å halde seg inne, for det skjer så mykje som er verd å få med seg.
Allereie klokka 10 opnar Osmessa i og rundt Nore Neset aktivitetshus, med blant anna vikingleir, gatecup og høgt aktivitetsnivå inne i hallen.
Frå klokka 11 er det open brannstasjon på Moberg i samband med Brannvernveka.
For tiande gong arrangerast Liafjellet Opp. Start klokka 12, med påmelding frå klokka 11.
Etter ein tur på open brannstasjon eller Osmessa er tida komen for å leggje turen til Øyane og vernissage hjå Vedholmen Galleri. Klokka 14 opnar utstillinga med kunstnaren Kjell Johannessen. Underhaldning ved Morten André Larsen frå Griegakademiet.
Er du fotballinteressert får du valets kval når klokka blir 15. Lysekloster tek imot Åkra heime på Lysekoster idrettspark medan Os tek imot Hundvåg på Kuventræ.
Når klokka blir 16 er valet sport eller musikk. På ER-AN Vegkro spelar The Vossa Rebels medan Os tek imot handballdamene til Voss i Oshallen.
Laurdagen avsluttast med å gje Rock n' LOL-guta ein skikkeleg avskjedsfest med vorspiel på Peppes frå klokka 18, før Bone Shakers, Cockroch Agenda og Datarock ristar Oseana frå klokka 21.
Klokka 20 inviterer også Os Swingklubb til dans på lokalet i samband med Osmessa. Dansen går føre seg i Symrasalen.
Og bur du i Lysefjorden er det på Ljosheim det skjer laurdagskvelden. Klokka 21 opner dørane til konsert og rock 'n roll med The Rolling Clowns.
Utestadane held sjølvsagt opne også laurdag.
Sundag
er det meldt omlag det same vêret som på laurdag med litt regn (0,1 - 3,9 mm) og vind opp mot 8,2 m/sek.
Osmessa opner dørane klokka 11 med høgt aktivitetsnivå og utstillingar innan kategoriane verktøy, Bil og båt, Aktiv fritid, Hus og Hage, Kunst, Mat og handverk.
Sundagen avsluttar du på bygdekinoen. Klokka 16 visast "De tøffeste gutta", ein film om Modulf som trur han er ein superhelt. For dei litt større går One Direction på lerrettet klokka 19 i filmen "One Direction - This is Us".
GOD HELG!