Fekk ikkje kontakt med passasjer
Ung mann henta av ambulanse. I tillegg var politiet ute på brann i busskur og ulovleg bål.
Måndag klokka 07.35 rykte politiet ut til Os terminal etter melding om ein busspassasjer som ikkje vakna.
– Vi kom fram til ein sovande mann i midten av 20-åra. Det var vanskeleg å få kontakt med vedkomande, så ambulanse blei tilkalla, opplyser politioverbetjent Anne Lyssand.
Oppdraget blei overtatt av ambulansepersonellet.
Måndag kveld blei det utrykking til bål og brann.
– I 20.40-tida rykte vi ut til ei adresse i Os aust, der ei kvinne i 60-åra hadde eit hagebål. Brannvesenet sløkte bålet og vi har oppretta sak.
Bålet var ikkje ute av kontroll, men hadde innhald politiet meiner ikkje høyrer heime i eit hagebål.
I 23-tida kom det melding om brann i eit busskur på Hatvikvegen.
– Det røykte godt frå eit bosspann. Årsaka kan vera bruk av fyrverkeri. Vi har fått forklaring av vitne på staden og oppretta sak.
