Eg hadde venta meir av ordførar i denne saka
DEBATT: Veljarane i Bjørnafjorden bør merke seg at Ap og Sp ikkje klarer å påvirke sine partifeller i regjeringa.
Eg er svært skuffa over Ap og Sp som i regjering har kutta 18 prosent av støtta til Kongshaug Musikkgymnas på Lepsøy.
Som eit resultat av kutt i støtta på 4,3 millionar kroner så må skulen snart nedbemanne om ikkje støtta kjem på plass igjen.
Denne støtta sikrar til ein viss grad likebehandling med den offentlege skulen, men er no blitt fjerna for Kongshaug.
Kongshaug er ein viktig lokal arbeidsplass i Bjørnafjorden og eit viktig skuletilbod for ungdom, både lokalt og i heile landet.
I ei tid med pressa kommuneøkonomi er det viktig å oppretthalde og skape nye arbeidsplassar.
Dersom eg blir valt inn i kommunestyret vil eg bruke all den innflytelsen KrF får til å kjempe for og påverke beslutningstakarar slik at støtta til Kongshaug vert gjenoppretta.
Ei stemme til KrF i valet er ei stemme til støtte for Kongshaug og arbeidsplassar i Bjørnafjorden.
Eg hadde nok forventa meir av ordførar Trine Lindborg (Ap) i denne saka.
Det har vore fagre ord, men ingen konkrete resultat. Eg er lei meg for at Lindborg ikkje har fått statsråd Tonje Brenna (Ap) og regjeringa til å snu.
Det er ikkje store summar det er snakk om, så dette burde la seg enkelt ordne dersom ein legg godviljen til.
Veljarane i Bjørnafjorden bør merke seg at Ap og Sp ikkje behandlar Kongshaug rettferdig, og at deira lokale folkevalde ikkje klarer å påvirke sine partifeller i regjeringa.
Stem KrF inn i det nye kommunestyret og gje oss mandat til å kjempe for å gjenopprette støtta til Kongshaug!
Jakob Enerhaug
1. kandidat for Bjørnafjorden KrF
