– Det blir kinosnacks
Sundag er det klart for ny runde med bygdekino. No er det klart at Oseana riggar til kiosk med kino-snop i samband med framsyningane.
Sundag blir Lotte og Månesteinens hemmelighet og actionfilmen Jack Reacher med Tom Cruise i hovudrolla vist på bygdekinoen. Då det sist var bygdekino i Oseana for fjorten dagar sidan var det ikkje tilbod om kinosnacks i foajeen før framsyninga, sidan avtala med Færingen som har hatt dette tidlegare var opphøyrd.
- Vi såg på om vi klarte å få til ei ordning allereie då, men tida blei for knapp.
- No har vi klart å organisera det, så denne sundagen blir det kinokiosk med eit rikt utval av kinosnop, fortel kulturhusvert Janne Mari Hjelle.
Ikkje popkorn
I kiosken vil ein finna brus, sjokolade, pringles og anna småsnacks.
- Det einaste vi ikkje får på plass er ei popkornmaskin, beklagar Hjelle.
Til å betjena kiosken får ho med seg nokre av dei som jobbar på bygdekinoen til vanleg.
Jobbar med ny løysing
Etter at styret i Oseana avslutta samarbeidsavtala med Færingen har det vore dårleg med servering i kulturhuset.
- Det er framleis ikkje avklart korleis framtida blir.
- Men det er i arbeidsgruppe i gang med representantar frå styret og administrasjonen som ser på forskjellege løysingar.
- Eg reknar med det ikkje tek alt for lang tid før vi kan presentera eit nytt serveringskonsept på huset, avsluttar Janne Mari Hjelle.