Færingen ut av Oseana

I styremøte i desember bestemte styret i Oseana KF å seia opp avtalen med Færingen Restuarant AS, restauranten som har vore i Oseana sidan opninga 17. juni 2011.

– Det stemmer at vi har sagt opp avtalen. Det blei bestemt i styremøtet 12. desember, seier styreleiar i Oseana, ordførar Terje Søviknes.

Søviknes vil ikkje seia anna om årsaka enn at det har med økonomi å gjera.

– Vi er avhengig av inntekter i Oseana, også frå restaurantdrifta, seier Søviknes.

Ville venta med å informera

Midtsiden kjente til at det skulle vera eit avgjerande møte i desember, men etter møtet ville ikkje Søviknes kommentera innhaldet.

– Grunnen var at vi, saman med Færingen, ville koma med ei felles presseorientering i romjula. Men så ville ikkje folka bak Færingen at vi skulle ut med dette i desember likevel.

Ser etter ny drivar

Oseana KF ser no etter ny drivar til restauranten. Færingen sin siste dag var 21. desember.

– I mellomtida driv vi serveringa sjølv, frå snop til kinoen til servering av drikke under arrangement, som under romjulsbluesen vesle nyttårsaftan.

– Ved større arrangement leiger vi inn eit eksternt cateringselskap.

Målet er å ha ny drivar på plass innan påske.

– Sjekkar saka juridisk

Dagleg leiar i Færingen Restauranter AS, Bjørn Mogenstad, seier Færingen var innstilt på å reforhandla avtalen.

– Vi meiner vi ikkje har fått dei vilkåra vi trengte for å sikra god drift.

– Blant anna har ikkje Oseana lykkast i å bygga volum. Dei har mange vellykka arrangement, men veldig få relatert til servering.

– At kulturhuset, som blant anna er kåra til "Årets Bygg", ikkje sel eitt einaste julebord, synes vi ikkje er godt nok. I tillegg driv vi og betalar leasing på eit storkjøkken til catering, eit kjøkken vi har brukt éin gong, nemner Mogenstad som eksempel.

Han innrømmer at Færingen skyldar husleige til Oseana.

– Men vi kunne gjerne ha skote inn meir kapital om vi hadde fått reforhandla avtalen med litt andre vilkår, seier Mogenstad, som no vil ha den oppsagte avtalen vurdert juridisk.