Arbeidsgjevar reagerte - promilletest gav utslag
Steinkasting, slåsting og forsøk på promillekøyring i helga.
Fredag litt før klokka 15, då ein tilsett skulle køyra bil, kontakta arbeidsgjevar politiet. Han hadde reagert på åtferda til arbeidstakar.
– Patruljen rykte ut og tok alkotest. Den gav utslag, og den tilsette blei henta av far sin, fortel politioverbetjent Anne Lyssand.
Kasta stein på bil på Halhjemsvegen
Laurdag klokka 15.35 fekk politiet melding frå ein bilist som hadde køyrd på E39 Halhjemsvegen då bilen hans blei treft av ein stein.
– Det viste seg at ein gut hadde stått på ei av bruene over Halhjemsvegen og kasta stein.
Bilførar vurderer å melda saka.
Førarkortbeslag etter ustabil køyring
Søndag i 14.50-tida blei ein bilist stoppa på Byvegen.
– Han køyrde ustalit, og blei tatt med for blodprøve.
Bilførar er ein mann i 60-åra.
– Det er tatt beslag i førarkortet hans.
I 04-tida natt til søndag tok politiet skilta på ein bil som var innom 7 Eleven. Bilen mangla EU-godkjenning.
Blødde frå leppa etter slåstkamp
Natt til laurdag fekk politiet melding om ein full, ung mann som hadde blitt nekta inngang, men vandra mellom utestadane, var ufin med vaktane og framsto som ustabil.
Politiet møtte vedkomande, ein mann i starten på 20-åra, og ein kamerat lovde å følgja han heim.
Natt til søndag var det slåstkamp i Os sentrum.
– Dei involverte er 22 og 32 år gamle. Den eine blødde frå leppa etter slåstkampen.
Saka blir meldt.
Laurdag i 23.30-tida fekk politiet klage på feststøy på Moberg. Festen var avslutta før patruljen kom fram.
Svane med krok i nebbet
Laurdag formiddag blei politiet kontakta av eit sameige på Søfteland, som vurderer borttauing av ein feilparkert bil.
I 11.30-tida laurdag fekk politiet melding om ei skadd svane i Hagavik.
– Svana har ein fiskekrok i nebbet. Viltkontakt er varsla.
