18 tatt i tre kontrollar på Halhjemsvegen
Sjekka trafikken på ferjekaien, i 70-sona og i 80-sona.
Politiet hadde fartskontroll to stadar på E39 Halhjemsvegen i går. I tillegg sjekka dei trafikken på Halhjem ferjekai.
Først, i 09.45-tida, sto dei i ei 70-sone på E39.
– Der blei det skrive fire forelegg. Høgaste fart var 92 km/t, opplyser politioverbetjent Anne Lyssand.
Det tilsvarer, med dei nye satsane, 9.100 kroner og tre prikkar på førarkortet.
Frå 11.20-tida målte dei farten i 80-sona frå Kolskogen mot Moberg.
– Her blei det skrive 12 forelegg. Høgaste fart i 80-sona var 100 km/t.
Vedkomande var 1 km/t å landa på same takst som den største syndaren i 70-sona, men «slapp unna» med 6.700 kroner og to prikkar på førarkortet.
Mellom dei to fartskontrollane var det promilletest på Halhjem ferjekai.
104 blei testa, alle var edrue.
– Men éin blei meldt for køyring utan fgyldig førarkort og éin blei meldt for køyring med hengar utan førarrett.
I løpet av formiddagen var politiet også oppom Lunde barneskule for å helsa på, som del av forebyggande arbeid.
– Patruljen blei godt mottatt av elevar og lærarar i storefri, fortel Lyssand.
