Rusa mann gjekk til angrep
Søndag ettermiddag møtte politiet ungdomar i ei leikehytte fylt med hasjlukt, søndag kveld fekk dei melding om ein valdsepisode i sentrum.
Søndag litt før klokka 19.30 fekk politiet melding om ei hending på Os bussterminal.
– Ein mann i 50-åra fortalde at ein rusa og aggressiv mann hadde gått til angrep på han, opplyser politioverbetjent Anne Lyssand.
Politiet rykte ut og snakka med partane.
– Ingen av dei involverte var skadde. Fornærma blei køyrd heim, og vil vurdera å melda hendinga.
Sterk lukt av hasj i leikehytte
Tidlegare på dagen, klokka 15.15, møtte politiet fire ungdomar i ei leikehytte på Os barneskule.
– Det var kraftig hasjlukt i hytta.
Dei fire ungdomane er gutar i alderen 16 til 19 år. Foreldra til dei tre som enno ikkje er myndige blei kontakta.
– Det er ikkje oppretta sak, men alle vil bli følgd opp i det forebyggande sporet. Politiet har kjennskap til dei fire frå før, fortel Lyssand.
