Vikjo får badebrygge

Mobergsvika, som i 2012 blei oppgradert med midlar frå Os Sjøfront-byggar StorBergen Boligbyggelag, får nok eit lite ekstratilbod til badande gjestar.

I går var Oddmund Dingen frå Bergen og omland friluftsråd i møte med bryggebyggar Alutec AS.

– Vi har bestemt oss for å gje vekk ei flytebrygge, og det er BOF som har drifta av Vikjo som friluftsomrdåe, seier Knut-Jarle Aspenes.

– Eg synest dei gjer ein veldig god jobb i BOF, med å ta vare på dei fine områda i Hordaland. No får dei nok ei oppgåve i Mobergsvika, i tillegg til å ta vare på stupebrett og toalettfasilitetar.

Slappe dagar i sola

Alutec har som kjent levert fleire brygger i same område, men marinaen innanfor nyemoloen har dei fått betalt for.

Den sponsa brygga er 2 x 6 meter og får badestige på kvar kortside, brygge med utstyr til rundt 35.000 kroner.

– Brygga skal leggast eit stykke utpå, men innanfor bøyane som held båtfolket vekke frå dei badande. Desse bryggene er ofte mykje brukt, spesielt av ungdom som vil ut og hoppa eller ligga og sola seg på brygga.

– Den skal forankrast frå frå midten av undersida, så ikkje det blir så mange tau å ta omsyn til for dei som kjem symjande, seier Oddmund Dingen, driftsjef i BOF.

– No blir sikkert Norvald glad

Knut-Jarle fortel at ideen om å sponsa med ei brygge fekk han ein gong Norvald Skåtøy var innom for å bestilla brygge, og kanskje for å slå av ein politikk-kollega med Espen Aspenes.

– Han spurde ikkje etter brygge på vegne av nokon, han berre nemnte at det hadde vore fint med ei brygge i Vikjo.

– Eg tente på ideen og har no fått både løyve av kommunen til å legga brygga ut og fått dialogen med BOF om drifta. Eg har ikkje snakka med Norvald sidan den gong, så han blir sikkert glad no, ler Knut-Jarle.

Brygga skal utpå i mai og blir tatt på land når hausten kjem, for lagring til neste sommar.