Vann 25.000 - viste kven ho vil gi pengane til
Banksjefen blei overraska og rørt.
Under LøpE39 laurdag sto sponsor Sparebanken Vest på stand. Der kunne du legga eit lodd i potten, pris per lodd var at du forsynte deg med din favoritt frå Twist-skåla.
Vinnarane fekk lov å gi kvar sine 25.000 kroner til kvar sine frivillige lag.
Litt over 200 av rundt 1.100 deltakarar var med i loddtrekninga.
Tone Linn Knutsson og Bjørnar Torgilstveit, som begge deltok på OneSubsea halvmaraton, blei trekt ut som vinnarar.
Bildeserie:
Bjørnar Torgilstveit gir 25.000 kroner til Eikelandsfjorden Musikklag, Tone Linn Knutsson gir 25.000 kroner til Rynkeby Vestland.
– Mens for eksempel Brystkreftforeningen får både støtte frå Staten og store inntekter frå sine kampanjar, får Barnekreftforeningen inga støtte frå Staten, men noko inntekt frå Rynkeby-prosjektet, fortalde Knutsson.
Banksjefen og kollegaen blei overraska, og seinare rørt.
Rynkeby er eit sykkelritt til inntekt for foreninga. Deltakarane er foreldre som har mista bornet sitt i kreft, pårørande og, som Tone Linn, folk som bryr seg.
Deltakarane betaler alle kostnadar sjølv, men sel reklameplass på sykkeltrøyene sine.
Knutsson har deltatt fire gongar. Vi intervjua Tone Linn før og etter første runde.
I år er ein annan osing, Jostein Bøe, med på Rynkeby. Denne gongen går turen til Paris igjen.
– Dei to siste åra blei det ikkje til Paris, men meir pandemivenleg her heime.
– I 2020 gjekk turen frå Ålesund til Bergen, i 2021 fekk vi ein veldig fin tur frå Bergen til Trondheim, der alle laga samlast før entré torget i Trondheim sentrum.
Tone Linn viste merke på drakta si, med namn på born som Rynkeby-deltakarane har mista, og fortalte historiar foreldre har delt med laget i løpet av sykkelturane.
