Syklar til Paris for born med kreft

Det starta med ein dansk gjeng med mosjonssyklistar, med tilknyting til juicebedrifta Rynkeby Foods, som i 2002 sykla til Paris for å sjå innspurten på Tour de France.

Gruppa fekk sponsorar og kronene som blei til overs blei donerte til barnekreftavdelinga ved Universitetssykehuset i Odense.

I dag går sponsorinntektene uavkorta til kampen mot barnekreft, syklistane betaler utstyr og reise sjølv. Rynkeby har nemleg vakse til å bli ein stor, nordisk veldedig organisasjon som sidan start har samla inn over 130 millionar kroner til saka.

– Dei fire norske laga som er etablert til no klarte åleine å samla inn 5,7 millionar i år, fortel Tone Linn Knutsson.

Ho er kollega med Gjøran Veiset, som sykla for eitt av dei fire laga, Team Rynkeby Rogaland.

Startar Team Rynkeby Bergen

Tone Linn ser på seg sjølv som ein fersk syklist. Handball har vore idretten hennar i ungdomen, men etter ein tur med kollega Jøran og kona hans blei ho gira på meir.

– Vi sykla løypa til Skjærgårdsrittet for 5-6 år sidan, men ikkje på tid. Allereie på veg heim med buss diskuterte vi å delta i Bergen - Voss.

No har Knutsson fire Bergen-Voss-ritt bak seg, i tillegg til blant anna Voss-Geilo.

– Sykling har blitt min nye hobby og då det blei plass til meg på Team Rynkeby Bergen takka eg ja med éin gong!

Trening og innsamling

Rynkeby-laget frå Bergen skal sykla saman med andre Rynkeby-lag frå Rikshospitalet i Oslo til Paris neste sommar.

Tour de France 2017 varer frå 1. til 23. juli, og Rynkeby-laga frå heile Norden får sykla prolog opp Champs-Elysses dagen før målgang.

– Det blir ei lita veke med 10-20 mil for dagen, så no har eg verkeleg noko å trena meg opp til.

– Samtidig handlar ikkje turen berre om å sykla, alle som deltar i Team Rynkeby er engasjerte for å støtta barnekreft-saka økonomisk. Vi er rundt 30 deltakarar på Team Rynkeby Bergen og vi vil alle prøva å henta inn støtte til saka.

– Mange av deltakarane har opplevd barnekreft sjølv eller i nær familie, mens andre er som meg, engasjert for å hjelpa ei god sak sjølv om vi ikkje har hatt denne typen kreft tett på oss.

– No vil dei neste månadane fram til 22. januar 2017, når vi skal summera hovudsponsorane i kategori gull, sølv og bronse, gå med til både trening og dialog med potensielle bedrifter blant anna i Os, seier Tone Linn Knutsson.