Unge forbilde lærer vekk handball

Bildeserie:

Full skjerm

1 av 15

Fleire av skulene har planleggingsdag i dag. For mange foreldre var tilbodet om Guttehandballdagen, som klubbane i Os har gått saman om å arrangera, eit kjærkomme aktivitetstilbod.

– Det er eit fantastisk initiativ, smilte ein av fedrene då han leverte poden litt før klokka ni fredag morgon.

35 frivillige

Til å ta vare på dei 136 gutane frå 1. til 7. klasse stilte 35 frivillige opp. Her var det aktive spelarar, som jentene på Nore Neset J14, gute- og herrespelarar på Os og rutinerte trenarar som dametrenar Gitte Torp og veteranane Grete Søviknes og Brit Tungeland.

– Uten eit så stort og godt apparat av frivillige som vi har med oss, så hadde vi ikkje klart å få dette til å gå rundt, skryt Eirik André Hesthamar frå arrangementskomiteen.

Dei unge spelarane blei delt inn i elleve grupper med omlag 12 mann på kvar gruppe og skal gjennom dagen gjennom elleve postar.

– Det er alt frå kortstafett og hinderløype til meir handballspesifikke ting, som å øva på hoppskot og ikkje minst spela kamp. Vi har freista å få til ein miks av postar slik at vi treff både dei yngste og dei eldste.

– Fordi det er gøy

Ei av dei frivillige som Hesthamar trekk fram er Anna Særvold Mjånes.

– Anna er ein fantastisk ressurs. Ho meldte seg omtrent før vi bestemte datoen. Ho har faktisk vore med som instruktør på samtlege gutehandballdager og alle jentefotballdagane vi har arrangert.

På sidelinja har ho full kontroll over gutane som er travelt opptatt med å spele kamp, men ho tek seg likevel tid til å fortelje kvifor ho stiller opp.

– Fordi det er gøy. Eg syntes sjølv det var gøy å vera med på slike ting som dette då eg var liten, og eg hugser korleis vi såg opp til dei eldre. Det å få vera med og kanskje vera eit forbilde for dei unge er gøy, smiler ho.

God rekrutteringsarena

Det er ikkje å stikka under ein stol at gutehandballdagen er eit forsøk på å rekruttera guter til å spele handball.

– Vi har sett dei tidlegare åra at mange som får sitt første møte med handball på gutehandballdagen møter opp på trening i sin klubb etterpå, noko som er veldig kjekt, og som vi håpar skjer i år også.

– Ekstra gledeleg i år er å sjå at over halvparten av dei som er med her i dag går i 1. til 3. klasse. Utruleg artig er det også å sjå at omlag 40 prosent av gutane går på Lunde eller Halhjem barneskule. Det lovar godt for den nystarta handballgruppa på Søre Neset, avsluttar Hesthamar med eit smil.