– Heia Søre Neset!
... kjem til å runga i hallane på nyåret når dei nystarta handball-laga til klubben spelar sine første kampar.
Bildeserie:
I mai fortalde tidlegare herre- og dametrenar til Os, Kenneth Husebø, at dei var i ferd med å starta opp handballgruppe i Søre Neset IL.
No er dei godt i gang med handball for ungar fødd i 2010 og 2011.
– For 2011-årgangen har det tatt heilt av. Vi er vel no 23 spelarar som har vore innom, fortel Husebø etter treninga torsdag ettermiddag.
Til å trena 2010-årgangen har han fått med seg ein anna røynd handballpersonlegheit i Joakim Nøkleby, mangeåring målgarantist på høgrevingen til Os.
– I 2010-årgangen er vi litt færre, der har vi førebels vore fem på treningane, så vi har plass til mange fleire. Vi trenar kvar tysdag i gymsalen på Lunde Barneskule, seier Nøkleby.
Ein stor overgang
Dei to fortel at det har vore ein stor overgang å gå frå å vera trenar og spelar på seniornivå til å trena seks og sjuåringar.
– Det har vore ei enorm utfordring i høve det eg er vant med. Det krev mykje meir av meg. Når eg kom på trening med herre- eller damelaget, så visste dei kva det gjekk i og det var berre å koma med ein ferdig plan.
– Her byrjar alle på null og vi må ta det frå botn av, men det er utruleg kjekt. Det handlar jo mykje meir om leik på dette nivået, men vi freister å gjera alle øvingane med ball, forklarer Husebø.
Imponerande framgang
Planen er å melda på lag til minihåndballserien som startar opp etter jul.
– Kor mange lag vi melder på får vi sjå litt på, men det blir gøy å spela kamper.
– Ungane imponerer meg. Etter berre tre treningar ser vi store framskritt, både med pakking av ball, kasteteknikk og finter, avsluttar Husebø og Nøkleby med eit smil.