Uavgjort mot gamleklubben
Åsne Takle Eide med «play of the day» då Sandviken tok poeng frå Arna-Bjørnar i serieopninga. – Det var kjekt, synest Åsne etter knallstart i ny klubb.
Søndag var det serieopning i Toppserien for kvinner med lokaloppgjeret mellom Sandviken og Arna-Bjørnar på Stemmemyren kunstgras.
Osing Åsne Takle Eide spelte heile kampen på høgre back for heimelaget, som ho gjekk til før denne sesongen.
– Eg er ganske nøgd med eigen innsats. Kanten deira fekk ikkje gjort noko ute på sida og måtte stadig gå innover i banen, så eg føler eg hadde god kontroll.
– Sjølvsagt kunne eg kanskje vore endå meir offensiv, men eg kom meg no opp nokre ganger og fekk slått innlegg, fortel ho.
«Play of the day»
Eitt av tilfella Takle Eide kom ser rundt på kanten blir av Odd Løvset på nettstaden Hordalandsfotball omtalt som «play of the day» og gjer at Sandviken utliknar til 1-1.
– Det som skjer er at kanten vår legg ballen tilbake til midtstopparen vår. Eg kjem meg høgt i banen og får ein hard pasning som stryk graset framover på banen. Eg tek eitt touch før eg slår inn. Der går Karoline Bakke opp i lufta og headar ballen i mål, oppsummerer Takle Eide.
Sjå skåringa her (VG TV)
Lot dei trilla ball
At det blei 1-1 er Takle Eide greitt nøgd med.
– Eg trur aldri Sandviken har vore så nær å slå Arna-Bjørnar. Hadde eitt av laga skulle tatt med seg alle poenga, så meiner eg vi skulle hatt dei. Dei har ballen mest, men vi har dei fleste sjansene. Eg trur vi vinn sjansestatistikken 6-2, og har blant anna stolpeskot.
– Bakover på banen føler eg vi har god kontroll. Vi lar dei ligga framfor oss og trille ball, men dei kjem ikkje til særlege sjanser.
Slo dei i treningskamp
Laurdag går turen til Harstad for Åsne og lagvenninnene. Der venter Medkila, eit lag dei slo 3-2 i treningskamp på La Manga tidlegare i vinter.
– Det var ein merkeleg kamp. Vi starter veldig bra, men plutseleg så skjer det eitt eller anna som gjer at vi kjem under 1-2. I pausen bytter vi åtte spelarar og reiser oss.
– Eg trur det kan bli ein litt anna kamp no. Eg håper og trur vi skal klare å slå dei, men det blir ein tøff kamp. Medkila er eit kriger-lag, noko som passer meg bra, seier høgrebacken.
Takle-Eide håper ho er blant dei 11 som får starta mot Medkila.
– Eg håper eg får starte også mot Medkila. Det er det første målet mitt å spele meg til ein fast plass i startoppstillinga, avsluttar Åsne.