Tømte lageret før ferien

Bomobil, som blei starta i Industrivegen i mai 2011, fekk ein god start og selte 12 bubilar i løpet av dei to første månadane i drift.

No fortel eigar Tor Egil Myksvoll om ei fin utvikling og ein hektisk innspurt mot ferie.

– Det har vore eit eventyr og dei siste vekene har vore heilt ville.

– No har eg selt 25 bubilar på to veker i juli, lageret er tømt så no tar eg litt fri.

Blant dei selte bubilane er både nye og brukte bubilar.

Ny leveranse i august

Bomobil lokkar til seg kjøparar også frå andre fylke.

– Men den siste tida har det vore aukande sal til osingar.

– Og vi får inn eit godt parti med 2014-modellar no over ferien, så det er berre å koma innom.

God vekst i 2012

Oddgeir Bjoarvik gjorde med Bjoarvik Bil suksess frå start med import av nyare bruktbilar.

I 2010, etter å ha flytta til Jordmorsvingen, starta Bjoarvik med bubilar og campingvogner.

– Trenden i Noreg er 11 prosent opp i år. Vi var kanskje litt framfor programmet, og hadde eit veldig godt år i fjor, men held oss på om lag same nivå i år, seier Oddgeir.

I tillegg til å selja bubilar og campingvogner leiger han ut to bubilar.

– Vi har så og seia fullt belegg gjennom heile sommarhalvåret. Vi har også verkstad og service for merkene vi fører, og merkar ei auke innan desse tenestene òg.

Fleire bein å stå på

I tillegg har Bjoarvik den siste tida selt Tysse-tilhengarar.

– Det har eg lærd meg, at sjølv om vi har mange tilreisande kundar og sel mykje via internett, er det viktig å ha fleire bein å stå på.

Han fortel at han sel rundt 20 bubilar, 35 campingvogner og 50 tilhengarar per år.

Vil utvida

Bjoarvik er nøgd med eksponeringa han får mot Byvegen frå lokalet og tomta i Jordmorsvingen.

– Men vi vaks ut av denne eigedomen i fjor.

– No ser vi oss om etter ein ny og større plass i Os, men har førebels ikkje noko på gang, seier Oddgeir Bjoarvik.