Tok ei julereingjering
Trass i åtvaringar måndag var det tett med parkeringssyndarar i Os sentrum tysdag. Det ser ut som om tilsette i sentrum er verre enn kundane.
Måndag fekk Midtsiden klage frå næringsdrivande i Os sentrum, som fortalte om fleire som brukte 2-timarsparkering, meint for kundar, til langtidsparkering.
Også teknisk sjef i Os kommune, Marianne Kramer, hadde mottatt klagar, og fortalte at sentrum skulle prioriterast når det kom til kontroll av reglane.
– Eg sjekka ikkje heile sentrum, men tok nokre langtidsparkerte på torget og fann mange syndarar framfor rådhuset og ved gjestebrygga.
– Det er heilt unaturleg at det skal vera fullt på desse plassane i 8-9-tida.
– Her er det nok tilsette og pendlarar, ikkje kundar som har gløymt å stilla klokka, seier vakt Elisabeth Thomassen.
På 1,5 timer skreiv ho ut heile 40 gebyr. Og då kontrollerte ho ikkje heile sentrum.
– Eg observerte også at flere som sto på 3-timarsparkering hadde stilt klokka til 12, kanskje for å gambla på at ein eventuell kontroll kom etter lunsj.
– Det var ledig plass på alle langtidsplassane, så her er det viktig at dei næringsdrivande og andre tilsette blir flinkare å gje plass til kundane og brukarane sine.