Tok beslag i førarkort
Politiet tok beslag i førarkort etter ulykka på Byvegen i går. I tillegg fekk dei melding om velta tre over Hegglandsdalsvegen og ei noko spesiell melding frå Catten.
Han hadde henta seg ny bruktbil i går, den unge mannen som same kveld kjørte i hekken på ein bil på Byvegen ved Jordmorsvingen.
Les òg: Knuste 5 timar gamal BMW
Ein dame i bilen som blei påkjørt blei frakta til legevakt for sjekk. Begge bilane blei skadd, den bakerste bilen fekk store skader.
– Det blei tatt beslag i førarkortet til den unge mannen som kjørte den bakerste bilen, seier lensmann Oddbjørn Dyrdal.
Mannen er mistenkt for uaktsam kjøring. Ulykka skjedde i 50-sona retning nord.
Tre velta over veg
Rundt midnatt var det både lyn, regn og mykje vind i Os.
– Klokka 00.21 fekk vi melding om naturskade i Hegglandsdalen.
– Eit tre låg over nokre straumleidningar ut over vegen. Små bilar kunne passera, men ikkje store. BKK blei sett på saka.
Ville sjå blålys
Klokka 00.23 natt til fredag fekk politiet melding om ein vanskeleg og "ustabil" gjest på Catten.
– Han hadde sagt at han ikkje ville gå før han såg blålys.
– Vi hadde ingen operative tiltak på den, så han står der kanskje enno, ler Dyrdal.
To born bak same belte
Politiet hadde trafikkontroll på Strønevegen og Røtingavegen i går.
På Strønevegen blei 24 bilar kontrollert. Det førte til éin reaksjon, då ein førar hadde gløymt førarkortet.
På Røtingavegen blei 21 bilar kontrollert. Der blei det skrive ein mangellapp og eit forelegg.
– Forelegget gjekk til ein bilførar som hadde sikra ungane for dårleg. To born sat i same sete, bak same belte, dermed blei det både gebyr og prikk på førarkortet.