Knuste 5 timar gamal BMW
I dag henta han seg ny bruktbil, i kveld kjørte den unge føraren i hekken på ein Suzuki.
Torsdag i 21.30-tida kom melding om trafikkulykke på Byvegen ved Jordmorsvingen rett nord for Os sentrum.
Ein BMW hadde kjørt på ein Suzuki bakfrå. Det sat tre kameratar i BMW-en, to vaksne kvinner i Suzuki-en.
Ingen skal vera alvorleg skadd etter ulykka, men ei vaksen kvinne er frakta til legevakt for sjekk.
Begge bilane blei skadd, men det var den bakerste det gjekk hardast utover.
– Bilen blei henta i dag, den var knallfin. Dette var utruleg kjipt for eigar, seier ein av passasjerane i BMW-en.
Kvinna som kjørte i Suzuki-en fortel at ho kom ned frå Jordmorsvingen og rekna med at ho hadde god klaring då ho la seg inn på Byvegen retning nord.
– Men eg hadde berre kjørt nokre få meter før det small, seier ho.
Politi og brannvesen er på staden. Ulykka har ikkje skapt trafikale problem.