To roarar frå Os skal representera Noreg

Coupe de la Jeunesse i Austerrike (6. til 8. august) og U19-VM i Bulgaria (11. til 15. august) står for tur første halvdel i august.

I slutten av juni kom uttaket.

– Det har blitt gjennomført tre dagar på Årungen med testløp i mange ulike kombinasjoner. Vi har tatt ut ein liten tropp mot U19VM og ein stor tropp mot Coupe de la Jeunesse (CdlJ), skriv roforbundet i uttaksbrevet.

I to av båtane i Coupe de la Jeunesse sit det unge, talentfulle roarar frå Os.

Linea Rådmannsøy Lunde frå Os Roklubb skal i firar saman med Helene Kjeseth (Fana), Marie Grøsfjeld (Stavanger) og Christiane Mohn (Fana).

Lars Eirik Vevatne frå Bergens Roklub skal ro i åttar saman med Hampus Westerberg-Heltne (Drammen), Sander Stundal de Vos (Bærum), Adrian Lund, Ormsund Ask Bergmann (Bærum), Erlend Refsum (Aalesunds), August Holth-Siegel (Årungen) og klubbkamerat Eirik Skage (Bergens).

– Første kvinne frå Os

– Vi er glade på Linea sine vegne, og stolte over prestasjonane hennar. Linea er Os Roklubb sin første kvinnelege utøvar som er tatt ut til representera Noreg i meisterskap, seier trenar Lars Erik Jansen.

Os var dessutan nær på å få to deltakarar med i uttaket.

– I uttaket på Årungen rodde Linea både singel og dobbel. Linea og Andrea Bastiansen Kvittingen var nær kvalifisering. I staden blei Linea tatt med i firar basert på prestasjonen i singel.

– Heldigvis kjem det fleire sjansar for både Andrea og Linea seinere denne sesongen, og ikkje minst til neste år, når begge er sisteårs junior.

Seinsommaren skal Os Roklubb bruka på rekruttering.

Den andre veka i august blir det tre dagar med roskule for ungar fødde i 2008, 2009 og 2010, som eit lågterskeltilbod til dei som vil prøva roing.